NABIYAAN man og pila ka puntos, apan ang women’s basketball defending champion nga Davao region, miasdang ug gipildi ang Calabarzon, 87-80, sa ilang semifinals showdown Huwebes, Mayo 23, sa University of Mindanao (UM) Matina gym.
Si Dian Claridad miiskor og 31 puntos samtang si Cate Dosdos ug Judy Enalim midugang og 17 ug 15 puntos, alang sa Crisanthemum “Ining” Sarabia-coached Davao squad, nga girepresentahan sa University of Mindanao.
Ang Davao nagkapuliki og apas sa paspas nga dinuwaan sa Calabarzon nga giubanan pa sa ilang lig-on nga depensa.
Apan ang mga Dabawenya wa nagpalupig sa Calabarzon, milabaw kini 62-60, sa paghuman sa third period.
Miagi pa’s daghang sakit sa ulo, apan positibo ang tim nga maangkon ang kadaugan, nga all-out sab nga gisuportahan sa nagsininggitay nga crowd sa pagpanguna ni National Prisaa president Ma. Lita Montlaban.
Dihang gipangutan paunsa sila nga misikad og balik sa kahinam, si coach Sarabia namahayag, “Motivation jud. Gi-ingnan nako senior sila, maas sila, ilaha ning court.”
Naglipay man sila sa ilang kulba-hinam nga kadaugan sa semis, apan suma ni Sarabia di sab kakumpiyansahan ang finals kontra Soccsksargen. “Paspas pud kaayo sila parehas sa Calabarzon, daghang shooters. I hope maminaw lang gihapon sila nako parehas sa ilang gihimo karon,” pahayag sa coach.