USA ka patay nga lawas sa babaye, gituohang nalunod, nakaplagan nga naglutaw-lutaw sa Davao River duol sa Holy Trinity Ecoland, Purok 33, Barangay 76-A, dakbayan sa Davao Huwebes sa buntag, Mayo 23.
Base sa taho sa pulis pinaagi ni Davao City Police Office (DCPO) director Police Colonel Alexander Tagum, mga alas 9:15 sa buntag, Mayo 23, ang Central 911 nagpahibawo sa istasyonan sa pulis sa nakaplagan nga patay nga lawas nga naglutaw sa suba. Human masayri ang insidente, mga pulis gipadala aron nga mohimo og pagsusi.
Sa inisyal nga imbestigasyon, nasayran nga sumala kang Angelito Canarias Alcorcon, 58, maintenance crew sa dredging vessel sa Department of Public Works and Highways (DPWH), nga samtang nanghipos sila sa steel floater sa dredging vessel uban sa mga anod nga kahoy ug mga basura alas 9 sa buntag, ilang nakita ang patay nga lawas. Hinungdan nga nanawag sila sa 911 aron nga mangayo og tabang ug itaho ang insidente.
Ang wala mailhing babayeng biktima gihulagway dunay igong gidak-on, mga 40-45 anyos ang edad, dunay gitas-on nga 5 ka tiil, nagsul-ob og itom ug puti nga sinina ug brown nga pantalon.
Ang hinungdan sa kamatayon sa biktima gituohan nga nalunod o nalumos ug posibleng gikan sa taas nga bahin sa Davao River hangtud niabot sa lugar kon diin siya nakaplagan.
Matud ni Tagum nga nakigkoordinar na sila sa nagkadaiyang istasyon sa pulis kon duna bay nawala nga indibiduwal sa ilang lugar aron nga madeterminar ang bansagon sa biktima.
Base sa ilang pagtan-aw sa lawas, ang biktima posibleng namatay sulod na sa 24 oras sa dihang nakaplagan siya.
Ang patay nga lawas sa biktima gidala ngadto sa Angel Funeral Parlor alang sa otopsiya. (JCR)