GITAWAG nga scam ug giingong maayo pa nga magpusil sa ulo ang kinsa mang lider nga nagpaluyo sa “Bikoy” videos.
Kini ang pintok nga pahayag ni Davao City Mayor Inday Sara Duterte-Carpio human kalit nga mikambyo og pahayag si Peter Joemel Advincula alyas “Bikoy,” ug misulti nga pulos bakak ang paglambigit niya sa “First Family” sa ilegal nga druga.
“Bikoy is a scam created by people who oppose the Duterte administration. Kung ako leader ng grupo na ito, I will shoot myself in the head, get rid of the brain that is not useful,” suma sa mayora.
Dugang sa opisyal nga nagkaguliyang lamang ang grupo ug wa na magkadimao ang ilang mga plano.
Adlaw’ng Huwebes, Mayo 23, gihimo ang press conference diin si Advincula alyas Bikoy miingon nga scripted ug ginama-gama lang ni Liberal Party ug Senator Antonio Trillanes IV ang tanan.
Suma ni Advincula nga gipaguwa nila ang video sa tumong nga lup-ugon ang administrasyon ni Duterte.
“Lahat yun pawang kasinungalingan. Kasinungalingan kasi may plano ‘yung kabilang kampo magpaputok ng issue para ma-divert ang attention ng tao, papataas nang papataas ang rating ng administration candidate, samantalang walang pumapasok sa Otso Diretso candidate.”
Sa iyang mga gibuhiang pahayag, diretsahang nangayo og pasaylo si Advincula ngadto ni presidential son Davao City 1st District Congressman-elect Paolo Duterte, ug kapikas ni Mayor Inday nga si Manases Carpio lakip na kang senator-elect Christopher “Bong” Go.
Alang sab kang Cong. Pulong nga sa sugod pa lang klaro na kaayong tumo-tumo ra ang mga pahayag ni Bikoy.
“From the very start, it was clear that the Bikoy videos were fabricated with a narrative taken straight from the playbook of people whose desire is to destroy our name and our reputation.”
Dugang sa kongresista nga wa sab siya masayop sa iyang duda nga si Trillanes ang nagpaluyo niini.
Gihagit sa opisyal ang awtoridad nga mohimo og imbestigasyon labot sa hitabo.
“Without a doubt, as I have said before, Senator Antonio Trillanes was behind it. And now that many names have also surfaced, to include Sen. Risa Hontiveros and several lawyers, I believe a proper investigation is in order.”
Sa kabahin sab ni senator-elect Go, aminado siyang nasakitan siya sa gibuhat ni Advincula, apan gipasaylo niya kini.
Niya, ihatag sab niya ngadto sa awtoridad ang kahigayonan nga maimbestigahan ang isyu.
“Masakit ang ginawa ni Bikoy sa akin. Sa kanyang mga kasinungalingan at paninira sa akin, pinapatawad ko si Bikoy bilang isang Kristiyano. Subalit, bilang isang Pilipino, hahayaan ko ang ating mga otoridad na gawin ang kanilang katungkulan sa anumang pananagutan niya sa batas. While I urge our authorities to respect all the constitutional rights of Bikoy, I must also say that the country needs to know the whole truth. After all, the truth will set us free. May panahon din ito. Naniniwala ako na bilog naman ang mundo,” dugang ni Go. (RGV)