TINUOD, komedyante si Vice Ganda pero sa It’s Showtime, daghan usab siyag mga seryoso nga mga linya nga may kalabutan sa mga panghitabo ug mga tawo nga niapil sa lainlaing bangga sa programa.
Usa sa bug-at kaayong pamahayag ni Vice iyang gibuhian niadtong bisperas sa Mother’s Day. Iyang gibatbat ang mga pag-antos ug sakripisyo sa usa ka inahan nga bisan makahilak kini, di kini ipakita sa mga anak ug ubang sakop sa pamilya.
Daghan ang natandog niadtong gisulti ni Vice. Usa sa labing naapektohan ang hurado sa Tawag ng Tanghalan sa Showtime nga si Randy Santiago.
Wa kapugngi ni Randy ang iyang mga luha. Gani wa dayon kini makasulti sa dihang gipangayoan kinig komentaryo sa pagkanta sa niapil sa bangga.
Bisan tinuod may mga higayon nga di ko makauyon sa isul-ob ni Vice, pero niadtong higayona, nakadayeg ko sa kaundanon sa iyang gisulti.
•••
Matod ni Irene Fernando sa GMA 7 corporate communications, nga nalupigan sa Kapuso Network ang kakompetensya niini sa 2019 midterm elections niadtong Mayo 13 sa gipahigayon nga pakisusi sa National Urban Television Audience Measurement (Nutam).
Mga pahalipay!
•••
Daghang mga artistang Kapamilya ang gipasidunggan karong bag-o lang sa lainlaing mga award-giving bodies sama nila ni Albert Martinez, Angel Locsin, Paulo Avelino ug uban pa.
Wa maapil sa listahan ang aktor nga alang nako, natural kaayo ang pagdala sa papel nga special child. Siya si Arjo Atayde nga maayo kaayong nakadala sa papel nga Eli sa The General’s Daughter.
Segurado kong moabot ra ang panahon nga ilhon ang abilidad ni Arjo sa pag-arte ning maong teleserye.
•••
Dunay nakapangutana nako kon nganong di na pirmeng moanhi ang mga artista bisan pa kon duna silay pelikula nga ipasalida. Di kuno sama sa niaging mga bulan nga sige silang makakita ug makalamano ug maka-selfie pa gani uban kanila.
Maayong maniid ang maong kaila ug nidugang pa kinig pangutana kon lakip ba sa hinungdan nganong nagmika ang mga Tagalog nga pelikula sa takilya ning uwahing mga bulan ang way promosyon.
Sa tinud-anay lang, medyo may kamatuoran ang paniid sa maong show biz observer. Hinaut nga makamata ang mga tinugyanan sa pag-promote sa mga pelikula nga morag nisalig sa social media pero ang resulta nagsangkiig.