SECTIONS
Saturday, August 24, 2019
SUPERBALITA CEBU

Super Suroy: Puti nga bas sa Bakhaw Beach

USA ka semana na lang sa dili pa matapos ang summer, pahimusli ang nahabilin nga mga adlaw sa dili pa mobalik ang klase sa ubang pribado ug publikong mga tunghaan.

Sa lungsod sa San Francisco, isla sa Camotes, adunay dagat nga kaligoanan sa publiko nga way entrance fee, apan white sand ug tin-aw ang tubig.

Naa kini nahimutang sa Sitio Taliwang Bas, Barangay Esperanza.

Gitawag kini sa mga molupyo nga Bakhaw Beach Resort.

Sudlunon kini nga dapit gikan sa main road. Apan makasud hinuon ang mga sakyanan o mahimo ka magpahatod sa habalhabal.

Green House

Dunay kasak-an o katulgan sa lugar kay may mga lawak nga paabangan.

Kon gusto ka makabarato kon mag-overnight, dunay entiro nga balay ang paabangan sa kantidad nga P2,500.

Gitawag kini og Green House.

Libre ang tubig ug kuryente. Aduna kini duha ka mga lawak nga airconditioned. Masud ang 10 ka mga tawo.

Ang balay adunay sala, dining set ug kusina diin mahimo ka makaluto. Aduna usab kini comfort rooms nga may supply sa tubig.

Kon molapas sa 10 ka tawo, mobayad ka og P100 matag usa.

Tapad sa maong balay, aduna usab laing lawak nga paabangan og P2,500. Masud ang 10 ka mga tawo.

Sa gawas sa balay, adunay dako nga tugkaran nga gikural diin mahimong makadagandagan ang mga bata o magduwaduwa.

Kon dili ra mo mangatulog sa lugar, duna usab mga lamesa ug cottage daplin sa baybayon.

Kon lamesa nga porma og higdaanan, P100 lang ang bayaran o depende sa sabot sa caretaker samtang usa lang ang cottage nga P200 ang abang.

Ang lungsod sa San Francisco buhong sa mga beach resort ug ubang mga lugar nga suroyanan sa mga turista.

Ang Bakhaw Beach Resort ang usa sa ikapasigarbo sa lungsod gumikan kay tin-aw ang dagat ug puti usab ang bas. Apan, dunay bahin niini nga batuon, hinungdan nga angay ka mag-amping kon maligo o kon bata ang maligo.

Kon mobisita ka sa lugar, seguradoa nga dili magpasagad og labay sa imong basura ug likayi ang sobra nga kasaba.

Kon gusto mo magsugba o magluto, pagpalit lang daan sa merkado sanglit tuyuonon ang Bakhaw Beach Resort ug dili usab maayo ang kahimtang sa karsada sa lugar.

Daghan usab og mga punoan sa lubi ug ubang mga klase sa kahoy nga imong kapasilongan gikan sa naglagiting nga kainit sa adlaw.

Unsaon pag-adto?

Duha ka option ang kapilian. Una, mosakay ka og OceanJet gikan sa pier 1, P500 ang pleti. Ug modunggo kini sa pantalan sa silingang lungsod sa Poro.

Matag adlaw, dunay upat ka mga biyahe gikan sa mainland Cebu paingon sa Poro, Camotes ug gikan sa Camotes padung sa mainland Cebu.

Kon mopadung og Camotes, ang fastcraft mogikan og alas 6 sa buntag ug alas 3 sa hapon.

Kon mopadung og mainland Cebu, kini mogikan sa Camotes alas 8 sa buntag ug alas 5 sa hapon.

Gikan sa pantalan sa Poro, kon magpahatod ka sa Barangay Esperanza, San Francisco, P150-P200 ang pleti o mag-agad sa inyong sabot sa drayber.

Laing option, sakay og barko sa Jomalia Shipping Corporation nga mogikan sa pantalan sa siyudad sa Danao, P200 ang pleti. Ang barko modunggo sa Barangay Consuelo, San Francisco. Ang biyahe matag adlaw magsugod sa alas 5:30 sa buntag ug sundan sa alas 7 a.m., 8:30 a.m., 12 n.n., 2:30 p.m., 5:30 p.m., ug 9 p.m.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph