NASUNOG uban sa iyang gipuy-ang balay ang usa ka 56-anyos nga lalake human giingong iyang gisunog ang kaugalingon pasado alas 8 sa buntag sa Huwebes, Mayo 23, sa Sitio YLA, Brgy. Basak, Dakbayan sa Lapu-Lapu.
Ang nasunog nailhang si Norman Mangubat Oyao, usa ka mamulkitay.
Matod ni Berman Flor Doyohim, pag-umangkon, nga nahibulong sila dihang miulbo og kalit ang kayo sa lawak sa iyang uyoan ug nagsiyagit na kini nga nagkayo ang tibuok kalawasan.
Dali unta nilang gipawong ang kayo nga midukot sa lawas, apan sila napakyas.
Napawong ra hinuon nila ang kayo sa pinuy-anan niini hinungdan nga wa makakatap ang kayo.
Dugang ni Doyohim nga sa miaging mga adlaw pa nagsige og bahad ang iyang uyoan nga magpakamatay, apan ilang gitambagan sa di pagdayon sa iyang plano.
Giingong gitaho sa barangay si Oyao nianang Miyerkules Mayo 22 gumikan kay nisuway kini sa iyang planong pagdaob sa iyang pinuy-anan apan napakgang sa mga silingan.
Ang lugar nga gipuy-an ni Oyao sikit-sikit ang mga balay.
Pagka-depress sa kaugalingon ang posibleng hinungdan sa pagsunog ni Oyao sa kaugalingon, matod sa iyang pag-umangkon.
Kini human giingong aduna kini kasungian sa iyang mga kabanay sa dapit nga mga silingan ra usab ni Oyao.
“Di naman gyud siya madala og kuan sa tubig, iya jud gisiguro iyang kaugalingon kay nagbubo man siya og gas sa iyang kaugalingon unya nagkisi-kisi pa siya. Mao ang mga gas mikatag pa diri. Wa jud mi mag-expect nga iyang tinud-on iyang bahad,” matod ni Doyohim.
Sa imbestigasyon sa Lapu-Lapu City Fire Department, di pa sila makatumbok unsay hinungdan sa sunog bisan sa pangangkon sa mga kabanay ni Oyao nga nagsunog kini sa iyang kaugalingon ug pinuy-anan.
Matod ni F02 Christian Clyde Tacandong, imbestigador, ang balay nga nasunog gipanag-iya sa maguwang ni Oyao nga si Alfredo Oyao.
Mokabat sa P80,000 ang gibana-banang danyos.
Sa Dakbayan sa Toledo, balay nasunog human mag-away ang magtiayon tungod sa pagselos sa lalake sa iyang kapuyo.
Nabilanggo sa Toledo City jail si Edgar Cabonita, 41, traysikol driver human giingong gisunog ang ilang balay gamit ang unas sa saging niadtong Miyerkules sa alas 6 sa gabii, Mayo 22.
Matod sa Toledo police, si Cabonita hubog nga niuli sa balay ug gikomprontase si Sheryl Bacalso, 35 kay nagduda siyang dunay lain.
Sa pag-init sa ilang panaglalis, gidagkutan ni Cabonita ang ilang balay nga gama sa light materials gamit ang lighter ug unas sa saging.
Dali siyang gidakop sa mga pulis ug bombero.
Si Cabonita nga naa sa kustodiya sa kapulisan pasakaan og kaso.
Mokabat sa P10,000 ang gibana-banang danyos sa sunog.