PINIRISONG nangangkon nga gikalag hinungdan nga siya mogilaw kon kuhaan og hulagway gawasnon na.
Ang piniriso, kinsa gitawag og “Ice Man” tungod sa paggilaw sa mga hulagway, nakapyansa og P30,000 sa kasong paghupot og illegal drugs niadtong Miyerkules sa hapon, Mayo 22, 2019.
Ang ngan ni Ice Man gipugngan ning mantalaan tungod sa iyang hangyo bugti sa iyang pagpa-interview sa Superbalita Cebu. Si Ice Man, 40, taga Yati, Liloan.
Si Ice Man napriso sulod sa lima ka adlaw ug upat ka gabii sa detention cell sa Centro Police Station sa Mandaue City Police Office.
Nakapahingangha sa mga kaubang piniriso ug sa mga pulis ang kuha nga hulagway niya kay nigilaw.
Iyang gibutyag nga siya nigilaw kay gisalipdan siya sa kalag niadtong Sabado sa buntag dihang gikuhaan siyag hulagway sa mga pulis.
Pangangkon sa piniriso nga tungod sa iyang third eye, makakita siya sa kalag ug ubang mga elemento sama sa engkanto.
Giingon nga usa ka kalag sa namatay sa maong prisuhan ang nitabon kaniya atol sa pag-picture sa mga pulis kaniya niadtong Mayo 18.
Apan sa dihang gikuhaan kini og hulagway ning mantalaan niadtong Martes sa buntag, Mayo 21, ug atol sa pagkuha og mug shot sa pulis niadtong Lunes sa buntag, Mayo 20, wa na ang mga gilak-gilak sa kalawasan.
Nipasabot siya wa na siya mogilaw kay wa na maghamok kaniya ang kalag sukad napagya ngadto sa ubang mga piniriso ug mga pulis.
Eksperto
Si Albert Pedrosa, eksperto sa Photoshop, usa ka matang sa photo editing software, nisulti sa Superbalita Cebu nga iyang gisuwayan sa paghimog effect nga susama sa hulagway ni Ice Man.
Iya kining nahimo.
“Posibleng fake pero, nganong maghimo man sab og fake ang mga pulis? Unsa may purpose?” nagkanayon si Pedrosa sa interbyu sa Superbalita Cebu.
Iyang giklaro nga bisan kon mahimo sa Photoshop ang mao nga effect, wa magpasabot nga fake o edited ang hulagway.
Siya nipasabot nga hayan dunay nakita ang camera nga di makita sa mga mata sa tawo.
“Ang camera mas daghan og makita kay sa mga mata sa tawo. Basin pag-flash naay nakuha ang camera,” pasabot ni Pedrosa.
Kon posible bang powder o abog ang naa sa lawas, matod ni Pedrosa nga posible.
Apan iyang gipasabot nga kon mga abog pa, nganong dunay mga parte nga mas migilaw.
Matod ni Pedrosa nga di siya mosalikway nga dunay paranormal nga nahitabo sa hulagway.
Apan iyang giangkon nga di siya eksperto niini.
“Mao nang katingalahan kon unsa siya,” ingon ni Pedrosa.
Gisalikway usab sa hepe sa Centro Police Station nga edited ang hulagway sa piniriso.
“Dili mahitabo nga edited, kay ako man actual nga nakakita, kay nagubot lagi sila ako D.O.(desk officer). Gitawag ko, so ako ni-try ko og picture. Mao man gyud, naa man gyud puti, walay rason nga editon nako,” pagpasabot ni Police Major Aldrin Villacampa sa Superbalita Cebu.
Sa iyang bahin, usa sa mga pari sa National Shrine of St. Joseph sa Mandaue City, Rev. Fr. Arthur Manalo, nitug-an nga ang Simbahang Katoliko bisan unsa nga paranormal o extraordinary nga panghitabo, mopalawom og imbestigasyon.
Andam usab sila sa simbahan nga mopahigayon og santos nga misa pahinungod sa kalag sa giingong namatay sa prisuhan ug ang pagbendisyon sa police station. (FMD)