BAG-O na ang mamunoan sa Cebu City hall ug sa Cebu Provincial capitol. Gipaabut nga manudlo sila sa ilang kaugalingong mga tawo. Ang Cebu city government adunay kapin kon kulang 5,000 ka mga empliyado samtang 4,021 ka mga empliyado sa kapitolyo. Nag-apil na kini sa mga regular, contractual ug job order employees (JOs).
Sumala ni Governor-elect Gwen Garcia nga ang iyang transition team maoy maghimo og usa ka special body nga mo-review sa performance sa tanang mga empliyado sa kapitolyo. Akong gipaabut nga mao usab kini ang buhaton ni Cebu City Mayor-elect Edgar Labella.
Si Labella nagpasabut nga dili siya manggukod sa mga tawo ni Mayor Tomas Osmeña. Sa ato pa ibasi gayud sa trabaho sa usa ka empliyado ang basihan kon ipadayon ba o dili ang ilang pagtrabaho sa city hall. Kana kon wala usab nila gamita ang ilang posisyon sa pamulitika. Dili gayud usab hinuon kalikayan nga ilisdan gayud sa mayor ang mga department head sa iyang mga kasaligan ug loyal nga dumadapig.
Murag lahi hinuon ang mahitabo sa Kapitolyo. Kay samtang anaay performance audit team iya nang gihisgutan nga daghang mga empliyado sa kapitolyo ang mitraydor kaniya sa dihang nibiya na siya pagka-gobernador. Natural ma-ilisdan gayud kini sila sa mga tawo nga lunod-patay kang Garcia. Dili na kini angay nga kahibudngan tungod kay daghang nagpaabut nga mga dumadapig sa mga napiling opisyal nga sila na usab ang mopuli sa mga job order ug contractual employees. Natural, sila gayud ang pangitaan og pwesto sa mga bag-ong magduma aron makolukar ang ilang mga alalay nga nagpaabut nga sila makatrabaho. Ako nasayud nga dunay daghang mangreklamo kon sila maapil sa matangtang sa trabaho apan mao kini ang kamatuoran sa pulitika.
•••
Sa 18th Congress karong Hulyo 22, magpili ang mga kongresista sa ilang speaker of the house puli kang Gloria Macapagal-Arroyo nga gipulihan na sa iyang anak nga si Mikey Arroyo. Sa 292 ka mga kongresista 102 kanila ang third ug last termer ug pulihan na sila sa mga bag-ong napili nga mga representante.
Ang front-runner mao ang PDP-Laban nga adunay 80 ka mga sakop samtang anaa usay mga partido nga naay daghang mga sakop sa kongreso. Ang PDP-Laban miahibawo nga magpili lamang sila og usa ka kandidato nga padaganon pagka-speaker. Maapil sila si kanhi speaker Pantaleon Alvarez sa Davao del Sur, Aurelio Gonzales, Jr. sa Pampanga ug Lord Allan Velasco sa Marinduque. Ang uban nga buot mokandidato pagka-speaker mao sila si kanhi Foreign Affairs secretary Allan Peter Cayetano (NP) sa Taguig, Martin Romualdez (Lakas) sa Leyte, outgoing senator Loreen Legarda (NPC) sa Antique ug Fredenil Castro (NUP). Dili tinuod ang taho nga moapil sa linya si outgoing senator Antonio Trillanes IV tungod kay dili siya nominee sa Magdalo partylist. Nagtuo ako nga mo-interbiner si Presidente Duterte pinaagi sa pagpahibawo sa iyang mga kaalyado kon kinsa ang iyang gustong mahimong speaker tungod kay gubot kon iyang pasagdan ang mga kongresista. (mannyrabacal1144@gmail.com)