Nalzaro: Namasangil na pod

GIPASANGINLAN na usab sa “laos nga pulitiko” nga maoy nagpaluyo sa pagpusil patay kang Police Captain Delfin Bontuyan. Human mapusili si Bontuyan niadtong Martes sa hapon duol sa usa ka mall, ang “laos nga pulitiko” mi-post dayon sa iyang Facebook nga nag-pasumbingay nga pulis maoy nagpapatay. Iyang gitumbok si Cebu City Police Office (CCPO) Director Col. Royina Garma ug Major Chuck Barandog, hepe sa City Mobile Force Company, nga maoy nagpaluyo. Iyang gibasihan kay gi-harass matod pa sa mga pulis niadtong eleksiyon ang anak ni Delfin nga si Christine Claire, kinsa mao ang Sangguniang Kabataan chairperson sa Talamban ug kaalyado sa Bando Osmena Pundok Kauswagan (BOPK). Unya duna kunoy pulis nga nangutana ni Delfin kon ig-unsa niya si Christine. Mao ra to. Unya pulis dayon iyang basulon ug pasanginlan. Morag gisagulan niya pamulitika ang kamatayon ni Delfin.

Way makatumbok kinsa ang nipatay kang Delfin. Wa siya maapil sa narco cops nga gibutyag ni Presidente Duterte. Tinuod, nabalhin siya sa Cordillera Administrative Region ug dayon sa Sulu apan wa siya mapasakai og kaso nunot sa kalambigitan sa illegal nga drugas. Anggulo sa drugas ang gisundan sa imbestigasyon kay daghang mga nadakpan si Delfin nga nalambigit sa illegal nga drugas dihang naa pa siya sa Criminal Investigation and Detection Group (CIDG 7).

Lahi ning kaso ni Bontuyan sa pagsuway sa pagpatay kang kanhi Tejero Barangay Captain Jingjing Cadungog nga adunay saksi nga pulis unta maoy mobira kaniya. Ug gani napatay ang pulis sa driver ni Cadungog. Lahi pod ang kaso ni PDEA agent Von Tecson nga gidudahang pulis ang nagbira ug nakabawos. Apan kang Bontoyan way saksi ug nakatumbok nga pulis ang nagtira kaniya.

Morag duna nay phobia ang “laos nga pulitiko” sa kapulisan. Wa pa siya mahuwasi sa nahitabo sa eleksiyon nga iyang gipasanginlan ang kapulisan nga gigamit sa iyang mga kaatbang. Iyang gipasanginlan nga maoy nang-harass ug nang-rakrak sa mga balay sa iyang mga kaalyadong kapitan sa kabukiran. Wa man gud siya makapagawas siya sa iyang kuwarta alang sa eleksyon kay gibantayan og maayo sa mga pulis maong suko siya. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph