SECTIONS
Thursday, June 27, 2019
SUPERBALITA CEBU

Away sa pamasahero: 2 patay

NAMATAY ang usa ka habal-habal drayber human siya pusila sa usa ka sakop sa City Traffic Management System (CTMS) atubangan sa usa ka bangko pasado alas 10 sa Biyernes sa buntag, Mayo 24 sa may Tamiya-Basak Road, Brgy Basak, Dakbayan sa Lapu-Lapu.

Apan ang gunman namatay usab human mapusili sa nirespondeng pulis atol sa hitabo.

Away sa pagpamasahero sa habalhabal ang gituohang motibo.

Ang biktima giilang si Junny Sollano, 38, taga Humay-Humay, Brgy. Pajo, Dakbayan sa Lapu-Lapu, presidente sa Tamiya Riders Association, kinsa nakaangkon og samad pinusilan sa may ulo.

Samtang ang suspek giilang si Rolando Castillas, 36, taga Suba Masulog, Brgy Basak, Dakbayan sa Lapu-Lapu, kinsa nakaangkon og samad pinusilan sa dughan.

Ang nakapusil ni Castillas mao si Police Corporal Jacinto Sagarino sa Marigondon Police Station, kinsa gidestino sa lugar.

Base sa imbestigasyon sa kapulisan sa Homicide Section sa Lapu-Lapu City Police Office, naglingkod si Sollano sa iyang motorsiklo daplin sa dalan.

Giduol siya ni Castillas ug gipusil sa walay igong rason hinungdan sa hinanali niining kamatayon.

Daling nisibat si Castillas apan wa siya makamatikod nga diha sa duol sa nahitaboan si Sagarino nga daling nakaresponde.

Napusilan usab siya sa pulis hinungdan sa iyang hinanaling kamatayon.

Matod ni Sagarino nga diha ra siya luyo sa usa ka bangko isip police foot patrol dihang nakadungog siya og buto sa armas de fuego.

Nakita usab niya ang mga tawo nga nangayo og tabang kaniya nga dunay gipusil.

Iyang giawhag si Castillas sa pagtahan, apan wa manumbaling kaniya, inay nagsige pa og wara-wara sa iyang armas hinungdan nga iyang gipusil.

Motibo

Dugang ni Sagarino nga dugay nang dunay kasungian sila si Sollano ug Castillas sa lugar.

Giingong gisita ni Sollano si Castillas sa iyang pagpamick-up og pasahero sa dii naandang lugar sa mga habal-habal drayber sa dapit.

Si Castillas giingong mo-sideline usab og habal-habal sa lugar kon way duty isip CTMS.

“Three weeks ago, nagpatabang ni nako si (Sollano) nga naa kuno sige sunod-sunod niya. Han-an siya og tion unya way armas. Mao to girespondehan nako pud. Akong gisita unya wa may armas. So, ako gipaadto sa barangay para amicable settlement. Dili lang ko kahinumdom mao ba to ni tawhan ang nihulga niya (Castillas),” matod ni Sagarino.

Gidayeg ni Police Colonel Limuel Obon, director sa Lapu-Lapu City Police Office, ang abtik nga pagresponde ni Sagarino.

Iyang gihulagway nga nagpakita lang nga epektibo ang ilang gipahimutang sa mga police outpost ug police deployment sa kadalanan sa dakbayan.

Nunot sa pagkamatay ni Castillas, makonsiderar na nga case closed ang insidente.

Nakuha sa posisyon ni Castillas ang usa ka kalibre .45 nga armas de fuego.

“Mao nay purpose sa atoa mga outpost to react immediately sa mga panghitabo. So, with his training and dedication he was able to fulfill his job. We will give him commendation (Sagarino),” matod ni Obon.

[Kini nga balita nag-develop pa. Mahimong i-refresh o mobalik sa page alang sa mga dugang pa nga mga detalye.]


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph