DUHA ka tawo nasikop sa gihimong buy-bust operation sa mga sakop sa Labangon police station 10 sa Sitio Sto. Niño, Back Japer, Barangay Quiot, sa siyudad sa Sugbo, alas 10:40 Huwebes sa buntag, Mayo 23, 2019.
Kapin sa usa ka milyon nga balor sa illegal nga drugas ang nasakmit sa kapulisan sa duha ka mga nadakpan.
Ang mga nadakpan mao silang Burt De Villa Batotol, 36, nga nagpuyo ra usab sa maong dapit ug Marvin Rivera Juagarap, 21, nga taga Spolariun St., Barangay Duljo Fatima, sa siyudad sa Sugbo.
Ang maong buy-bust operation gipangulohan mismo sa hepe sa Labangon police station 10 nga si Police Major Keith Andaya.
Nakuha kang Batotol ang tulo ka medium plastic packs ug laing pito ka large packs nga motimbang sa 190 gramos nga gibana-bana nga mobalor og P1,292,000.
Samtang kang Juagarap, nakuha ang buy-bust money nga maoy gigamit sa pagpalit sa shabu nga mokantidad sa P9,000.
Ang duha ka nadakpan kasamtangan nga nabilango sa selda sa Labangon police station. (Superbalita Cebu)