USA ka 29-anyos nga ex-convict sa kaso sa paghupot og armas ug giingong sinaligan ni Eddie Basillote ang nasikop sa mga sakop sa Mabolo police station, atol sa buy-bust operation sulod sa Chinese Cemetery, Barangay Carreta, sa Siyudad sa Sugbo.
Naila ang nadakpan nga si Florentino Sambrano Solon alyas “Eglo” nga taga Barangay Carreta, sa Siyudad sa Sugbo, nga giingong sakop sa Eddie Basillote drug group.
Nakuha sa dinakpan ang 12 ka medium packs ug tulo ka small packs sa gituohang shabu nga motimbang ang tanan sa 63 grams nga mobalor sa P428,400.
Matod ni Police Major Dindo Alaras, ang hepe sa Mabolo police station, nga si Solon usa sa mga sinaligan ni Basillote sa negosyo sa ilegal nga drugas, sa Barangay Carreta.
Gidugang ni Alaras nga human mangadakpan ang mga notado nga mga drug pusher sa Ponce 2, Barangay Carreta, si Basillote na ang mipuli sa pagpamaligya sa ilegal nga drugas.
“Ming dako na gyud ni siyag maayo (Eddie Basillote) especially nga ang atung operation diha sa Ponce 2 daghan tag nakuhang dagko, so tanan atong nakuha namo gi-assume to niya tanan to, dako gyud to si Eddie,” matod ni Police Major Dindo Alaras.
Giila ni Alaras nga usa ka idlas nga drug personality si Basillote sa Barangay Carreta nga maoy hinungdan nga naglisud sila sa pag dakop niini.
Tungod sa iyang kadako naabot na ang ilegal drug trade ni Basillote sa Barangay Talamban.
Si Eddie Basillote, mao ang gitabangan og kulata sa mga armadong tawo nga gituohan nga mga sakop sa Talamban police station nga nakuhaan og video sa closed-circuit television. (AYB)