NASAPON ug nagtingkagol sa prisuhan ang usa 21 anyos nga lalaki human nakuhaa'g marijuana ug nasapon nga adunay tanom niini niadtong Huwebes mga alas 6:00 sa buntag sa Purok-8, Puerto ning siyudad sa Cagayan de Oro.

Hiniusang elemento gikan sa Philippine Drug Enforcement Agency, Regional Office 10 ug ang 1st Maneuvering Company 10th Regional Public Safety Management Battalion (RPSMB)

nipahigayon og marijuana eradication diin nasikop si Alpe Jamisola-Baconguis, 21, ulitawo, walay trabaho ug nagpuyo sa susamang dapit.

Si Juliet Caga-anan, Public information sa PDEA-10, nibutyag sa Sun.Star Superbalita nga nasapon si Bacanguis nga namunyag sa tanom nga marijuana sa likod nga bahin sa puloy-anan niini.

Nakuha gikan sa posisyon niini ang 50 ka gramo nga liso sa marijuana, walo ka mga punoan sa marijuan ug 1 ka tranparent cellophane nga adunay uga nga marijuana, apil niini ang 17 ka mga Marijuana saplings nga gitanom sa putol nga kawayan.

Matud ni Caga-anan nga taod taod na ang gihimong pagsurveillance niini human adunay misulti sa gihimong pagpananom ug illegal nga druga.

Gani pipila na ka higayon nga adunay mitawag sa kadugay nga wala kini giaksiyonan.

"Ang PDEA dili gyod basta-basta magdakop diretso bisan adunay report, gitun-an kini pag-ayo ug giplano, ug gisurveillance, dihang napamatud-an, usa pa gyod sikopon," Matud ni Caga-anan.

Sa kasamtangan nagtingkagol sa prisuhan sa PDEA nga natigayong pasakaan og kaso samtang ang nakumpiska gikan niini natigayong dalhon sa PNP-Crime Lab alang sa masusing eksamin.