NAGPAKITA og saktong kondisyon si Kawhi Leonard ug nipupo kini’g 35 puntos aron agakon ang Toronto Raptors ngadto sa kadaugan batok sa host Milwaukee Bucks, 105-99, kagahapon sa Game 5 nga naghatag kanila og 3-2 nga bintaha sa Eastern Conference finals series.
Si Leonard, kinsa gilimitahan og oras sa Game 4 gumikan kay nagsagubang kini og over fatigue, mipasabot nga kinahanglan niyang moagresibo alang sa iyang tinguha nga maagak ang Raptors sa labing una niining pagsulod sa NBA Finals.
Usa na lang ka daog ug matuman na kini.
“I’m not afraid of the moment,” matod ni Leonard. “This is what I work out for in the summer. I’m just trying to win. It’s a matter of me being aggressive and don’t shy away from anything.”
Si Leonard nakatilaw na og NBA title niadtong 2014 dihang nagduwa pa siya sa San Antonio Spurs. Niadtong higvayuna, siya ang napiling Finals MVP.
Si Fred Van Vleet nidugang og 21 puntos alang sa Raptors, niamot og 17 puntos si Kyle Lowry samtang nihatag og 14 puntos si Pascal Siakam.
“He has been unbelievable in the playoffs with the Spurs as well,” matod ni Raptors coach Nick Nurse kabahin kang Leonard.
“I can only say that he’s been really good. He gets stronger as the fourth wears on. He wants the ball and he wants to make the plays and he seems to be making the right plays. You’re almost shocked when he pulls up at 15 feet and it doesn’t go in. He’s playing at both ends.”
Mao kini ang ikatulong sunodsunod nga kadaugan sa Raptors human sila nakatilaw’g pilde sa nag-unang duha ka mga duwa sa series.
Sama sa naandan, ang Bucks gipangulohan na sab ni Giannis Antetounmpo pinaagi sa iyang 24 puntos, niamot og 20 puntos si Eric Bledsoe, nidugang og 18 puntos si Malcolm Brogdon samtang nitunol og 16 puntos si Brook Lopez.
Bisan naggukod na sila sa series human, ang Bucks, nga maoy No.1 team sa regular season, malaumon gihapon sa ilang poruhan nga makasulod og balik sa finals human sa dugay na nga panahon.
“We’re not going to fold,” matod ni Antetokounmpo. “Come on, man. Best team in the league, man. We’re not going to fold. We’re going to go in and give it everything we’ve got. We can’t fold. We’re going to come back to Milwaukee being (ticked).”
Ang Bucks kaduha pa nakasulod sa NBA Finals ug nahitabo kini niadtong 1971 ug 1974. Nakuha nila ang NBA title niadtong 1971.
“It’s first to four. We’ve got to go to Toronto, get a game. I think the group will be ready,” matod ni Bucks coach Mike Budenholzer. (ESL, AP)