MIPAKATAP og 26 puntos si Lyle Eredera, midugang og 24 puntos sa Clint Carl Basister aron ituboy ang Barangay Cuanos ngadto sa 87-68 nga kadaugan batok sa Pakigne sa nagpadayon nga 2019 Minglanilla Mayor’s Cup Summer league 21-under Bracket C nga gipahigayon sa Minglanilla Sports Complex niadtong Huwebes sa gabii.
Sa kadaugan nagpabilin nga limpiyo ang baraha sa Cuanos human sa lima ka mga duwa.
Ang Cuanos mao ang naghatag sa labing unang kapildihan sa Pakigne (5-1) nga gipangulohan sa 16 puntos ni Nino Reserva ug 11 gikan ni Andrew Tapila Jr.
Sa 17-under category Bracket C, gilubong sa Tungkop, 85-55, ang Calajo-an aron irehistro ang ilang ikaduhang daog sa lima ka duwa.
Si Jandel Ababon ug Welmar Cantiveros nagkumboya og 27 puntos alang sa Tungkop samtang bugtong lang si Ian Clifford Ebua ang naka-double figure sa Calajo-an, kinsa sama sa Tungkop aduna usay 2-3 nga record.
Samtang as 40-up division, mikutlo og 15 puntos ang kanhi varsity player sa Salazar Institute of Technology (SIT) Skyblazers nga si Benjie Adlawan sa dihang gipukan sa White squad ang Gray, 87-69.
Gawas sa 15 ni Adlawan, ang White nakakuha usab og 14 gikan ni Pewen Campus samtang si Elmer Mojado miyagyag og 19 alang sa napukan nga Gray. (JBM)