NAMATIKDAN nga nagkanunay na ang pag-ulan halos matag gabii dinhi sa siyudad sa Davao.
Kini bisan pa man kon wala pa modeklara ang Philippine Atmospheric Geophysical and Astronomical Services Administration (Pagasa) nga panahon na sa ting-ulan.
Tungod niini, di malikayan nga ubang mga bahin dinhi sa siyudad, ilabi na gyud sa mga kadalanan sa downtown area, mobaha nga maoy makahasol sa mga sumasakay ug mga motorista.
Nagtuo kita kaniadto nga ang hinungdan sa pagpunay og baha sa kadalanan sa downtown tungod duol kita sa dagat. Ilabi na gyud kon magdungan ang ulan unya taob ang dagat.
Puriso sa dihang gi-rehabilitate ang mga dalan sa downtown area, gipatas-an kini og diyutay ug mga kanal giilisan og imburnal nga dagko aron nga kon motaob man ugaling panahon nga mag-ulan, di na molapaw sa kadalanan ang tubig.
Apan bisan pa sa maong kabag-ohan, nagpabilin gihapon ang problema, mobaha gihapon kon mobunok ang ulan.
Sa dihang gisusi, di gyud diay ang dagat maoy hinungdan sa mga pagbaha sa dalan sa downtown kon di ang nagtipun-og nga mga basura pasagad lang nga gilabay sa mga hingtundan.
Niadtong milabay nga adlaw, na-post sa social media ang paghabwa sa mga personahe sa City Environment and Natural Resources (Cenro) sa may dalang San Pedro og mga basura sa kanal nga nadiskobrehan nga napuno diay kini og mga botelya mineral water hinungdan nga mobaha ang dapit.
Wala magkuwang ang atong mga opisyal sa pagpahimangno kanato sa saktong paglabay og mga basura subay sa gipatuman nga Solid Waste Management sa dakbayan.
Apan naa pa gyuy daghan sa atong mga kababayan nga mapasagaron ug iresponsable sa paglabay sa mga basura.
Way mabasol niining suliran sa pagbaha sa kadalanan sa downtown area, kon di ang molupyo gihapon.
Kon gusto kitang masulbad o kaha maminusan o diyutay ang suliran, kinahanglan nga mahibawo kitang moatiman sa atong kaugalingong mga basura ug sundon nato ang maayong pamaagi ug paglabay niini.