BISAN og nakapara o nakabara og 23 ka mga drayber atol sa ilang operasyon niadtong Biyernes, Mayo 17, gikanayon sa Davao City Transport and Traffic Management Office (CTTMO) nga wala pa silay nadakpan nga drayber nga naggamit og peke nga identification cards.
Si CTTMO chief Dionisio Abude nagsulti nga ang operasyon gilusad aron lutuson mga drayber nga naggamit og peke nga public utility vehicle (PUV) IDs.
Matud ni Abude nga sa nilabay nga higayon, ang iyang mga personahe nakadakop og drayber sa taksi nga naggamit og peke nga ID. Laing drayber sa dyip nadakpan sab tungod sa paggamit og peke nga driver’s ID.
“Nagasugod na ta sa ato operations since humana ang Palaro (Palarong Pambansa). Halos everyday atong operations,” matud niya human sa flag raising ceremony sa City Hall of Davao.
Bag-ohay lang, 30 ka smartphones ang gihatag ngadto sa CTTMO aron nga gamiton sa ilang operasyon.
Tug-an ni Abude nga ang maong mga telepono makasusi sa katinuod sa mga IDs kay duna kini mga special features, sama sa QR Code scanner.
Apan matud niya nga ila pang ayuhon ang uban ka mga depekto sa ilang sistema.
“Naa tay incident nga gi-capture nila ang ID, tas ang migawas kay tulo ka picture. Amo pang tan-awon ang among sistema, kung iyaha ba gyud or sa amo ang naay problema,” tin-aw ni Abude.
Giklaro ni Abude nga mga drayber nga naggamit sa mga peke nga IDs dakpon tungod sa kasong “falsification of public document”.
Samtang mga drayber kinsa mapara o mabara tungod kay walay PUV IDs pamultahon og P1,000.
Hinuon, gibutyag niini nga daghan pang mga drayber ang wala magkuha sa ilang PUV IDs sa ilang buhatan.
“Nakita nato pipila ka libo naa sa opisina tungod wala nila na-claim ilang ID. Dili dapat isyuhan og PUV ID ang mga walay prangkisa. Mga naay prangkisa lang man dapat magdagan-dagan sa Davao (City),” dugang pagklaro ni Abude. (RGL)