STA. MARIA, Davao Occidental -- Gideklara sa Bureau of Fisheries and Aquatic Resources (BFAR) nga luwas na ang probinsiya gikan sa paralytic shellfish poison (PSP) o red tide toxin.
Sa abiso sa BFAR nga gipaguwa niadtong Huwebes, Mayo 23, nasuta gikan sa laboratory results nga gihimo sa unang semana ning bulana, gideklarang negatibo na sa PSP ang lugar, lakip sa Balite Bay sa Mati, Davao Oriental.
Unang giabisohan sa BFAR ang mga konsumante niadtong Abril nga gidili ang pabiyahe o pagkaon sa mga alamang ug shells gikan sa maong mga lugar tungod kay apektado sa red tide nga hayan resulta sa kainit sa tubig sa dagat tungod sa El Niño.
Mahimong makasinati og pagkalipong, sakit sa ulo ug tiyan, kalibanga ug pagsuka-suka ang usa ka indibiduwal nga makakaon sa apektadong shells ug alamang nga naay red tide.
Gikalipay sab sa mga tindera sa merkado ang maong balita kay mobalik na sab pagtaas ang ilang kita human mihinay kini tungod sa red tide.
Sumala ni Esther Saavedra nga mamaligyaay og mga kinhason, sa probinsiya nga dako ang nawala sa ilang kita dihang nabalita nga anaa ang presensiya sa red tide sa ilang dapit. (Orlando B. Dinoy)