DUHA ka mga treasure hunters nga nagkalot sa Sitio Tipakis, Barangay Tapak, Paquibato District, dakbayan sa Davao ang namatay human mahulogan og dakong bato, Huwebes sa hapon, Mayo 23.
Giila ang mga biktima nga sila Ernesto Alicabo Cabiles, 68-anyos, residente sa Barangay Malabog, Paquibato District ug Junite Eben Hurtil, 19-anyos, taga Barangay Sumimao Paquibato ug pulos mga treasure hunters.
Sa impormasyon gikan sa Paquibato PNP, nakabalo lamang ang mga otoridad sa panghitabo dihang dunay residente sa lugar ang nagpahibalo kanila.
Nasayran nga bag-o pa nahitabo ang insidente, nagakalot sa lugar ang mga biktima sa pagpangita og tinago nga bulawan, dihang kalit midahili ang dako nga bato gikan sa taas nga bahin sa ilang gikalutan.
Diha dayon, natabunan ang duha sa dakong bato nga maoy hinungdan sa ilang kamatayon.
Gisulayan pa og dala sa balay tambalanan ang duha ka mga biktima apan wala na kini kinabuhi pag-abot sa ospital.
Ang barangay sa lugar hugot na nga nagbantay sa ilang dapit aron malikayan ang pag-treasure hunting. (Richy F. Nalagon)