TAGUM CITY -- Padayong naghimo og lawom nga imbestigasyon ang kapulisan sa Tagum City Police Station human sa pagpatay sa usa ka guest relation officer (GRO) Biyernes sa kaadlawon, Mayo 24, sa Gazman Road, Magugpo West.
Migula sa imbestigasyon sa kapulisan sa Tagum PNP nga bandang alas 9:30 sa gabii, migawas sa trabahoan ang biktima nga si alyas Sheila, 26-anyos, kinsa giingong kauban niini ang usa ka wa pa mailhing lalaki dayon nag-check inn sila sa usa ka lodging house sa dakbayan.
Nasuta sab nga alas 2:40 sa kaadlawon, migula ang lalaki dayon misunod ang biktima ug natigayon ang ilang panaglalis nga maoy hinungdan sa pagbunlot og pusil sa suspek dayon gipusil ang biktima.
Nasulayan pa og dala sa Davao Regional Hospital sa Tagum City ang biktima apan patay na kining nahidangat.
Duha ka mga basiyo sa bala sa .9mm kalibre nga pistola ang nahipos sa Scene of the Crime Operatives sa nahitaboan.
Gipalawam pa sa kapulisan ang ilang imbestigasyon lakip na sa pagsubay sa kuha sa closed-circuit television (CCTV) camera aron maila ug masikop ang suspetsado. (Jeepy P. Compio)