GOOD news. Kadtong mga empleyado nga bisan og pila na ka tuig nga nangalagad sa kompaniya nga ilang gitrabahoan apan wala gihapon ma-regular, angay na karon magmaya.
Kini tungod kay niadtong Miyerkules, Mayo 22, 2019, hingpit nang giaprobahan sa Senado ang balaodnon nga nagwagtang sa contractualization nga panrabaho o naila nga “endo.”
Dili nato ikalimod nga hangtod karon daghang mga kompaniya nga ang ilang mga trabahante papirmahon lang og tagun-om ka buwan nga kontrata. Kini aron paglikay nga ma-regular ang mga mamumuo.
Kon kinahanglanon pa ang posisyon ug nauyonan ka sa imong serbisyo, bag-ohan ka og laing unom na usab ka buwan. Pero sagad niini di na gyud ka balik ug mangita na lang pud og lain nga kasudlan.
Kining ingon aning pamaagi otomatikong mawagtang na unya sa higayon nga mapirmahan na sa presidente ug i-implementar na ang Senate Bill 1826 o Security of Tenure Act.
Dili na unya madali-dali sa pagtangtang sa ilang trabaho ang mga empleyado kay protektado sila sa maong balaod gawas lang kon makakomiter og seryusong sala sa ilang gitrabahoan.
Ang House of Representatives niadtong Marso 23 sa niaging tuig pa mipasar sa ilang kaugalingong bersiyon sa maong balaodnon (House Bill 6908).
Mao usab kini usa sa mga saad ni Presidente Rodrigo Duterte atol sa iyang kampanya sa 2016 elections.
Hinuon posibling dunay pipila ka mga kompaniya nga dili maigo niini ilabi na kadtong mga contractors. Apan kinahanglan usab sila nga mokuha og permiso gikan sa Department of Labor and Employment sa dili pa sila makasugod sa operations.
Pero yuna ra. Di ba kining contractual employees anaa man sab ni daghan sa gobiyerno ubos sa nagkalain-laing departamento? Apil ba sila niini? Kini maoy angay tinuon.