TRABAHANTE sa Apo Cement patay human gibanhigan sa wa mailhing armadong tawo niadtong Huwebes, Mayo 23, sa gabii sa Sitio Purok Bayabas, Barangay.Inuboran,dakbayan sa Naga.
Patay si Benjie Abaquita, 38, minyo, nagpuyo sa dapit, human natusaktusak sa mga bala ang kalawasan.
Si Chief Insp. Jason Villamater, hepe sa Naga Police station nga nahinabi sa Superbalita Cebu, nagkanayon nga ang biktima sakay sa motorsiklo padulong mopauli sa ilang panimalay.
Apan wa pipila ka metros gikan sa ilang balay, giatngan na siya sa wa mailhing tawo ug gipusil.
Ang biktima nakadagan pa unta apan gigukod ug giusban sa pagpusil hinungdan sa kamatayon niini.
Matod pa ni Villamater nga personal grudge ingon man may kalambigitan sa trabaho ang gisusing motibo.
Gipadayag niya nga way record sa kapulisan si Abaquita busa ilang gipalawman ang imbestigasyon kon way nakasungi sa trabahoan ug ubang uban pang mga kasayuran. (GPL)