WALO ka mga lalake ang nasikop samtang tulo niini nasakmitan og armas sa kapulisan sa Police station 1 sa Mandaue City Police Office (MCPO).
Ang tulo nga nakuhaan og pulos .38 kalibre nga armas gidudahang manulis apan nasikop sa checkpoint, pasado alas 11 sa gabii niadtong Huwebes, Mayo 23.
Ang duha nga lulan og motorsiklo giila nga sila Marlon Batoon, 23, taga syudad sa Danao, ug Roel Jumao-as, 27. taga Luyang, lungsod sa Carmen.
Matod ni Police major Aldrin Villacampa, hepe sa kapulisan, nga walay plate number ang motorsiklo sa mga dinakpan ug sa dihang gisita wala usab napakita nga papeles. Na-recover gikan kanila ang duha ka armas.
Laing nakuhaan og armas, mao si Roque Alburo, 32, kinsa luwan sa taxi.
Sa dihang nipahinay og dagan ang taxi sa tungod sa nagpahigayon og checkpoint, giingon nakita sa kapulisan nga kadudahan ang lihuk ni Alburo hinungdan nga gipahunong ug gisita.
Giangkon ra sa mga dinakpan nga sa ila ang nakuha nga armas, apan gipanghimakak nila nga aduna silay himuon nga krimen. Matod ni Jumao-as nga nasuguan sila ni Batoon nga ipahatud ang armas ngadto sa dakbayan sa Sugbo, gikan sa Carmen.
Apan giingon nga wala sila madayon, hinungdan nga naabtan sila sa checkpoint.
Mao usab ang pasangil ni Alburo, kinsa niingonl nga gisugo paghatud ngadto sa duol sa simbahan sa siyudad sa Lapu-lapu.
Apan giangkon ni Alburo nga manggamitay siya og drugas hinungdan nga usa sa nakaaghat kaniya nga mosugot paghatud sa armas.
Ang laing lima ka dinakpan sa checkpoint nakuhaan og mga pakete sa gidudahan nga shabu.
Gipanglantawan na MCPO ug Lapu-Lapu City Police Office (LLCPO) ang pagsiaw sa mga tulisan diha sa mga pampubliko nga pasaheruan, sama sa jeep, ug bisan na sa dalan o mga manglabnihay ilabi na ning nagsingabot nga pag-abli sa klase.
Hinungdan nga ang programa nga ‘Pulis sa Jeep’banhawon nila. Random nga mosakay sa mga PUJ ang mga unipormadong pulis, manghatag og leaflets agig tips paglikay sa kremin.
Gihingusgan na ang programa sa miaging tuig apan nahunong human na-busy sa mga dagko nga kalihukan sama sa eleksyon.
Matod ni MCPO director Police Colonel Julian Entoma nga ipa-roving ang mga pulis sa mga lugar nga mingaw atol sa gabii ug kaadlawon. (FMD)