ANDAM ang embahada sa United Kingdom (UK) nga motabang sa awtoridad sa pagsumpo sa online sexual exploitation of children (OSEC) nga nagpadayon nga naglihok sa Sugbo.
Mao kini ang pasalig ni UK Ambassador Daniel Pruce atol sa pagbisita niini sa Sugbo niadtong Huwebes, Mayo 23.
Matod ni Pruce nga di kalimod nga usa ang ilang nasod nga giila isip usa sa mga “leading consumer” sa mga malaw-ay nga buhat hilabi na may labot niining OSEC.
“It’s a sad fact that the Philippines is one of the leading imagery of that sort. UK is one of the leading consumer of that sort,” matod ni Pruce.
Matod ni Spruce nga bisan pa man niini, nakigtambayayong ang ilang gobyerno aron usab matabangan ang Philippine National Police (PNP) nga mahatagan og kahanas bahin sa computer forensics.
Ang mga mibuhat niining matang sa exploitation migamit og laptops, desktop computers o smartphones aron ma-contact ang ilang mga kustomer nga kadaghanan naa gawas sa nasod.
Matod ni Pruce nga pinaagi sa ilang gi-establisar nga bag-ong Philippine Internet Crimes Against Children Center (PICACC) sa Camp Crame nahatagan nila og higayon ang mga awtoridad dinhi sa Pilipinas nga mopaubos og pagbansay aron makahibaw sa pagkuha og ebidensiya pinaagi sa computer forensics.
Gilusad ang PICACC niadtong Pebrero ning tuiga diin ang gobyerno sa Australia lakip nga nakigtambayayong sa PNP may labot niini.
Sa natala sa PNP, usa ang Sugbo sa hotspot areas sa nasod nga daghang natala niining cybersex o OSEC.
Aduna pay kaso nga ang ginikanan mismo ang nigamit sa ilaang anak aron himuon kining biktima o giabusohan pinaagi sa OSEC bugti sa kuwarta gikan sa ilang langyaw nga kliyente.