ANG Commission on Elections (Comelec) sa Dakbayan sa Sugbo nipahinumdom sa tanang kandidato sa miaging piniliay sa pagduso sa ilang Statement of Contributions and Expenditures (Soce) sa di pa matapos ang Hunyo 12.
Si Atty. Marchel Sarno, election officer sa south district, niingon nga kadtong mapakyas pagduso sa ilang nadawat ug nagasto sa piniliay mapahamtangan og multa.
Ang acting election officer sa south district niingon nga adto iduso ang Soce sa Comelec office nga maoy gidusuan sa kandidato sa ilang mga certificate of candidacy niadtong Oktobre 2018.
Sa Cebu City, ang kapin 50 ka mga kandidato nidaog man o napilde, adto moduso sa ilang Soce north district sa buhatan ni Atty. Chauncey Boholst.
Ilawom sa balaod, ang mga pulitiko gitugotan nga makagasto og P3 matag botante, apan ang way partido kun mga independente, makagasto sila hangtod P5 gawas lang sa presidente ug bise presidente nga makagasto hangtod P10.
Lakip sa mga expenditure nga ibutang sa Soce mao ang gasto sa pagbiyahe sa kandidato ug iyang mga personnel lakip na ang bayad sa campaigners, clerk, stenographer ug messenger.
Apil usab ang pag-printa sa mga election materials, gasto sa election watchers panahon sa election ug daghan pang uban.
Kon mausban sa ikaduhang higayon, ang maong kandidato adunay dako nga kahigayonan nga di na makapapili og balik sa bisan unsang posisyon sa gobyerno nga iyang daganan ug huptan.
Si Sarno niingon nga kon dili maka-proseso ang kandidato para sa iyang Soce, mahimong makaduso ang treasurer sa ilang partido o kadtong tawo nga iyang gisugo nga maoy molihok sa mga dokumento.
Hangtod ning pagsuwat, wala pay nadawat nga Soce ang Comelec Cebu City. (PAC)