SECTIONS
Monday, June 17, 2019
SUPERBALITA CEBU

Radaza midusog election protest

PROTESTA: Sila si kanhi mayor Arturo Radaza (ikaduha gikan sa tuo, naglingkod) ug Harry Radaza (wala, naglingkod) mipasaka og election protest batok nilang Mayor-elect Junard Chan ug Vice Mayor-elect Selsi Sitoy. Kuyog nila si Mayor Paz Radaza (tuo) ug manlalaban Zandro Ronnie Oriol (ikaduha gikan sa wala). (Alan Cuizon)

NISANG-AT og election protest si kanhi kongresista ug kanhi mayor Arturo “Boy” Radaza ug Harry Don Radaza batok sa ilang kaatbang pagka mayor ug bise mayor sa dakbayan sa miaging piniliay nga sila si Mayor-elect Junard “Ahong” Chan ug Vice Mayor-elect Celsi Sitoy.

Ang kampo sa mga Radaza pinaagi sa ilang abogado nga si manlalaban Zandro Ronnie Oriol nikompirmar sa ilang lakang atol sa katapusang adlaw nga mahimong mo-file og election protest sa Commission on Elections (Comelec) en Banc sa kaulohan.

Matod ni Oriol nga katuyoan sa ilang protesta mao ang pagsuta nganong giingong nawala ang 19,713 votes sa 84 ka mga clustered precincts sa dakbayan atol sa piniliay.

Matod ni Oriol nga moabot sa 177,717 ka mga botante ang nibotar sa piniliay sa 214,117 ka mga botante sa dakbayan.

Ang nibotar sa pagka mayor sa dakbayan moabot sa 158,004 ka mga botos alang sa lima ka mga mayor.

Hinungdan nga nahibulong sila asa ang ubang sobra nga mga botos.

Si Arturo napildi ni Chan og 19,868 ka mga botos.

Sa pagka bise mayor, moabot usab sa 150,053 ka mga botos ang natigom sa lima ka mga kandidato gikan sa 177,717 ka mga nibotar.

Nahibulong usab sila asa ang 27,664 ka mga botos.

Si Harry napildi ni Sitoy og 5,592 ka mga botos.

Gawas pa niini, giingong nakadawat sila og mga reklamo sa ilang mga supporters nga Radaza ang ilang gibotar, apan sila si Chan ug Sitoy maoy migawas sa resibo.

Ni-breakdown usab, matod pa, ang pipila ka mga Vote Counting Machine (VCM).

Kini gipundok sa mga magtutudlo aron sila na lang ang mopasud niini sa mga VCM nga wa masubay sa election procedure.

Gumikan sa ilang nadiskobrehan, gibutyag ni Oriol nga lakip sa ilang tinguha sa election protest sa Comelec en Banc sa kaulohan ang annulment of proclamation kang Chan ug Sitoy sanglit giproklamar nga kuwang pa ang statements of votes sa 84 ka mga clustered precincts.

Ubos sa ilang protesta gikatakdang mohangyo sila alang sa manual recount sa tanang botos aron masubay asa ang ilang gituohang nawala nga botos.

“Eighty four clustered precinct is a substantial figure that supposedly could not have been or there should not have been a proclamation kay dili man kompleto,” matod ni Oriol.

Si Arturo, sa iyang bahin, nibutyag nga di na unta siya mo file og protesta kay sayod siya ka kakuti ug kagasto niini.

Apan giingong naaghat siya sa iyang mga supporters nga giingong andam magtampo-tampo alang sa ilang protesta.

“Bahala maabtan pa ni og sunod election o ba kaha molapas pa ang sunod election. Basta ang akoa ani mogawas gyud ang kamatuoran,” matod ni Radaza.

Si Chan, sa iyang bahin, niingon nga katungod ni Radaza ang pag-file og protesta, apan giawhag na lang kini niya sa pag move-on sanglit nihukom na ang mga Oponganon nga siya ang bag-ong mayor sa dakbayan. Daghan pang suliran sa dakbayan nga angay hatagan og pagatagad.

“The Oponganons have decided. They want CHANge. I therefore advice Mr. Radaza to respect and accept the overwhelming mandate of the people of Lapu-Lapu City and move on,” matod ni Chan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!