NASIGNIT sa kapulisan ang usa ka lalaking nag-atubang og kasong pagpangawat didto sa lungsod sa Sta. Maria, Davao del Sur.

Si Inspector Francisco Demetria, hepe sa Sta. Maria Police, niila sa dinakpan nga mao si Dondon Clemente, taga Sitio Tibungoy sa lugar.

Matud ni Demetria, nasiplatan nila ang suspek human gipagula ni Judge Norma Rusty-Calatrava, ang warrant of arrest batok kaniya.

Giingong ang dinakpan nag-atubang sa kasong robbery.

Mga alas 11:20 ang takna sa buntag, Pebrero 25, dihang gipaslak sa kapulisan ang dinakpan didto sa ilang selda.

Gitakdang itunol sa kapulisan didto sa 5th Municipal Circuit Trial Court (MCTC) ang dinakpan.

Sa pikas bahin, laing halas nga banakon na usab ang gihatod didto sa buhatan sa Bansalan Police Office, Huwebes sa hapon.

Si Inspector Reyniel Raotraot, nitataw nga mga ala 1 pasado sa hapon dihang nakit-an ang halas nga nitabok sa dalan didto sa Barangay Sibayan sa lugar.

Human nasiplatan abtik kaayo ang katawhan sa pagpatay sa maong banakon.

Tulo na ka mga banakon ang anaa karon sa buhatan sa kapulisan human gibalsamar.

Ila kining gihimo aron maalerto ang katawhan sa dagway niini sanglit gituohang daghan pang susama niini ang mogawas diha sa kabukiran nunot sa kainit sa panahon. (Dondon Dinoy)