GITUDLO sa Davao del Sur Electric Cooperative (Dasureco) ang National Grid Corporation of the Philippines (NGCP) nga maoy nagbuot kun pila ka oras pawngon ang kuryente dinhi sa probinsya sa Davao del Sur.

Gikan adlaw'ng Huwebes, mas nisamot ang pag-alma sa mga negusyante human mitaas gikan ta'g usa ka oras ngadto sa lima ka oras ang brown-out sa mga lugar nga apektado niini.

Mas nityabaw karon ang mga negusyante tungod nanirado na lamang sila sa ilang establishemento sanglit way mahimong transaksyon atol sa power curtailment.

Apan si Khessa Balabag, Regulatory Compliance Officer, nitataw nga wa silay mahimo sanglit pagbuot sa NGCP nga patas-on ang oras sa pagpawong sa linya sa kuryente sa Davao del Sur.

"The real issue here, is if we will only look closely into the problem, it is the diminishing water level of our major power source - the Ma. Cristina, due to El Niño, climate change and all other acts of God, which are beyond the control of man," niya.

Gitandi katawhan kun nganong hamubo lang ang oras sa brown-out didto sa siyudad sa Davao.

"Considering Davao City as the largest city in the country, obviously, their curtailment is spread out and shorter. They also have many large load customers which can very well take on themselves larger bulk of the curtailment requested by NGCP," pasabot sa Dasureco.

Pangutana sab sa pipila ka mga nagpakabanang sektor nga mamahimo bang maduso ang "class suit" batok sa mga power producers ug distributors tungod sa hitabo.

Apan si kanhi Davao del Sur Integrated Bar of the Philippines President Lawyer Israelito Torreon, nikanayon nga gikinahanglan pa ang makuting pagtuon.

"Basta naay gwapo nga grounds nganong dili. But that needs a lot of research," ni Torreon.

Nasayran sa Sun. Star Superbalita, nga dili lang ang hulaw sa Maria Cristina maoy hinungdan sa pagnihit sa kuryente kundi apil niini ang pag-undang sa operasyon sa Iligan Diesel Power Plant nunot sa taas nga operational budget.

Ang Agus 1 ug 2 sa kasamtangan nag-operate lamang og usa ka turbine inay nga duha. Ang Agus 4, nipadagan sab og usa inay nga tulo samtang ang Agus 6 ug 7 usa lang sab ka unit inay nga lima.

Matod sa NGCP nga ang mga planta sa Agus, nag-generate lamang og 137 megawatts inay sa normal nga 694 megawatts.

Naa sab unta sa siyudad sa Iligan ang Psalm power plant nga makahatag og 54 (MW) apan dili pa kini operational.

Giingong P60 milyones matag bulan ang gastuson sa pagpadagan og 35 MW nga planta. (Orlando B. Dinoy)