USA ka lalaki ang gidala sa ospital human gitigbas sa iyang kainom didto sa Purok 7, Barangay Kaligutan, lungsod sa Laak, Comval Province.
Ang biktima nailhan nga si Antonio Reponte, hamtung ang panuigon, molupyo sa Purok 7, Barangay Kaligutan.
Samtang ang suspek nailhan nga mao si Cirilo Sentillas, 30, molupyo sa susamang dapit.
Sa report gikan sa Comval Province Police Provincial Office, nasayran nga nahitabo ang pagpanigbas pasado alas 9:30 sa gabii niadtong Miyerkules.
Nag-imon matud pa ang biktima ug ang suspek sa usa ka tindahan nga gipanag-iyahan ni Noai Yagnia sa nahisgutang lugar.
Nagkalalis ang duha nga misangko sa duguong insidente.
Sa iyang kapungot, miuli sa ilahang balay ang biktima ug mikuha og sundang ug miuna siya og tigbas ngadto sa suspek.
Naigo sa likod ang suspek apan nailog pa niya ang sundang sa biktima ug mibalos siya og tigbas.
Naigo sa nagkadaiyang parte sa iyang kalawasan ang biktima ug daling gidala sa Laak Municipal Hospital.
Apan gibalhin sa Davao Regional Hospital sa dakbayan sa Tagum tungod sa grabeng samad nga iyang nahiaguman.
Ang suspek ang wa na sab mihimo pa sa pag-ikyas ug mitahan sa iyang kaugalingon ngadto sa mga otoridad.
Ang kapulisan sa lungsod sa Laak, mihimo na og dugang imbestigasyon sa nahisgutang hitabo.
Samtang kasong frustrated homicide ang gihikay na sa kapulisan batok sa suspetsado. (Marvin Pineda)