SECTIONS
Monday, June 17, 2019
PAMPANGA

Garcia: Nukarin la ring Bayani king Kasalungsungan? (Where are the Heroes at Present?)

Kapisik

ISAKWIL la reng taliring lalapastanga’t

gagabak king sagisag ning katimawan;

Lulura king lupa nang nwan ning Indu

at apibabata na pang ipadilat iti

karing anak nang alang malit.

Pagumasdan mu ing kayagpang kapal

ning kekang mengalumpis, mepatang balat -

Keka ku ngeni babalikid

bang magi mung punsalang

king kapanwalan mung melili.

Ibulalag da ka’t lubasan...

Ika ing managinis

karing alang kamale-male king kekang kalilwan...

E da ka kabud namu paimburisang minum

king dayang gewa mung alak

Layun lalasing keka’t magpadayukduk

Pauli ning kekang kasakiman...

Kakabsi ka king kaparatutan!

Ika ing babalat mabye

king basal a katawan ning tibubus a dalaga.

Lalapastanga’t mililili, kakaliwa’t tutukup

karing mata nang melula king pengakung aslag

a e naman dintang misan mu man.

Kampung na ka ning dalumdum

Inya nu mu ta...

at kapilan nung sakali man,

Apatutwan ing kalaramang mengari king kamandag -

Manaluntun karing kauyat-uyatang malati

ning anting-suli lambut,

anting-api katibubus

a pungul?

Ikaginalu mu sa’ing sarili mung lasun

At yang maging kutkutan mu

ing tagimpan mung palasak.

Pauli ning kabkaban na ka’t ngatngatan

Ning sarili mung ulimo...

Ulimong peparagul mu

King salu mung kisnang kapanwalan,

o kapalalwan king sarili mung mamatat king laman.

Ding keka...mengari king pataram,

Kinalawat, sinakmal...

king sangkan ning kelang apamilinan,

pauli ring ketasan da puluk

ding makatwang mibansaga’t magsangkan-sangkang watas -

a pinili’t kinaul anting linta king pisak at kabulagan.

ding magulyang magsangkan-sangkang watas -

a babandi king panyulat at pamigale...

bista’t lipit king murang diwa,

layun sakdal-siri kalipit king aslag ning katutwan

layun maranup king lasa

ning kalaramang milingad karing basal a pusu.

Samban mu’t dilatan ing lurang keka inapsa da

ding bangi’t palak ding kapagnasang mapanyakup

at keka naman pupugayan

king sabla mung dapat at pamangamanu...

king pamanduku mu’t pamanyiklod

karing larawan ning kalaramang karela pepasamba –

larawang piglibe da karing karelang disna’t timbunan

king kutkutang pepayaun da karing megi dang alipan.

Bang king kelambatang mipalaut a pangagapus

Ya naming tinggap dang anting ginu

king dambanang telakad da ring mengasukul a kaisipan.

Maginalu ka, sukab!

Maginalu ka’t mayangu na bye!

Namnaman mu ing katatawlyang inawa

Agnan ning katatawlyang pulandit ning daya

Karing uyat mung mangapatad na’t magpasambulat

King dimut mung utak a lilu!

Maginalu ka, sukab!

Aldukan mu na ing tawling angin

A king salu mu magpatimawa,

Matad king mengalawang mung talikala

Tinggap mu’t kinaul anting pakamalan!

Pamun...sukulan ning maling kapanwalan.

Puge king katimawan!

~Miguel Serrano, “Daing Sukab”

Ka-19 ning Bulang Panigu, 2007

Ika’ing pamagmalang minulit pe’tubu

king putut a dila ring maldang mepipi

king kalaraman o kapanekasan

ning legwang binulag layun menamuyut

king melanging dungus a binang melasun

king panatang tipas uli ning tagimpan

a biglang inabit at lakwas inigut

layun nang sinubsub ning galgal at sindak

king kamatayang bunga ning kalukan

pati na ring dagis e da na ayamyam

a maging tuknangan o gawin dang lungga!

E wari dapat mu - sakdalang malaso

king kalang a dungus - ing sablang asiba?

Ika ing lagablab saring magpapaningning

king sadyang palsinta a migpatibubus

king laput a diwa a mekapapuput

king talagang salung lakwas pepalapo

king dayang minagus uli ning mapurul

a kapagnasang bolang o pamitangal

a selawla layun tinilak nang bigla

ning pamangulila a binang sinawa

king ligayang supling ning pamagkalunus

o pangayalipan at ing pamanangis

e makapaldan king panandam a lumpu!

E wari makatud - bitasang malubus

ayamyam ning pusu ing ing pamanyawa mu?

~Apung Igi, “Dalit Daun kang Ninoy”, 07.07.2003

***

Dake Talabaldugan:

1. gutgót/gutgút – (panguri) kagutgutan, gute, gisi, gabak, gapak. English: torn or rent into pieces. Alimbawa king pamangamit: “Gutgut ya tali sapatus iny amisakb ya keng dalan palub pipagaralan na i Ambu.”

2. gutgót/gutgút – (panguri) kagutgutan, gute, gisi, gabak, gapak. English: torn or rent into pieces. Alimbawa king pamangamit: “Gutgut ya tali sapatus ina misakab ya keng dalan palub pipagaralan na i Ambu.”

3. gutlî – (palagyu) sakit keng balat a keraklan mag-nana. English: skin sores. Alimbawa king pamangamit: “Kasna yang utli ing asu inya agyang kinuba de ala mu ring bisang mangan.”

4. guyabano/guyabanu– (palagyu) benabana, unaba. English: soursop, Graviola tree fruit, custard apple. Alimbawa king pamangamit: “Dakal ya pala ayuyulu ing guyabanu inya mikamal la uling pisasamsaman da la reng sasali ngeni.”

5. guyapâ – (panguri) gugupu, sayukut, kubakub, ukus. English: bowed down by heavy burden or age. Alimbawa king pamangamit: “Guyapa ne ing matwa inya e ne mitagal keng pamanatad kang Amung Bascon, asne pamo kaburing tuki.”

***

GAWING MEKALINGWAN KARING KAPAMPANGAN!

Marayung kakadwa king pamanyuyu king Apung Ginu ya pin ing alang panayang kapalit a pakamal king Indung Balen. Awsan de iting kabayanyan dapot king panaung kasalungsungan, malagad neng tutu at mekad pagsisti da ka pa nung sabyan mu iti kareng aliwa. Mekalingwan na iti anti king pamangalingwan da reng tau keng katapatan. Pekamaulaga ngeni karing keraklan ya pin ing salapi at ing sablang anabang pauli niti. Inya pin sa’manawang na para karing keraklan ing kabayanyan.

***

PAMITUD: Ing bayung Cura Parroco pala pu ning San Nicolas de Tolentino ning Makabebe ya pin i Rev. Fr. Marcelino Bustos Mandap at aliwa ding mibalita keni inyang milabas a Myerkulis. Panupaya pu.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!