Legario: Ang mahinumdoman sa Diyos

Kaniadtong mga bata pa mi sa akong mga igsuon, kanunay gayud nga mabunalan mi pag-uli sa balay gikan sa simbahan. Kay matag-hawa namo ngadto’g simbahan, ang among amahan kanamo nagapasidaan: ayaw pagsaba-saba sa simbahan, dapat magpuyo gayud sa lingkuranan, sa sulod dili dapat magdagan-dagan, or else, sa latigo among lubot mabuthan.

Ug matag Sabado pag-uli sa balay, kami sa akong mga manghod sa hilak magtubagay. Kung unsa kadaghan sa among mga sala nga nahimo, ingana pod kadaghan ang labhag sa among mga lubot.

Mao na nga dili mi ganahan matapos ang Sabado kay bunal may sangkuan pagsalop sa adlaw.

Maayo pod baya to’ng pamaagi aron nga mabansay mi’g pag-ayo sa saktong pamatasan sa simbahan. Ug tungod niana, nadungog pod kunuhay ming mga buotan.

Apan sa akoang pagpamalandong karong mga panahona, aduna koy dako nga na-obserbahan sa mga kasinatian nako sa simbahan, ang pamunal maoy “pinaka” sa akong mga mahinumdoman.

Sukwahe sa akong nahibaw-an ni Ginoong Jesus, nga bisan pa unsa ka dako ang kasal-anan sa babayeng nasakpan nga nagpakighilawas, wala Niya giihap ang iyang kasal-anan (Juan 8: 1-12).

Ang kadto hinuong mga hipokrito nga naghukom sa babaye maoy Iyang gipasantupan sa ilang mga sala, ug gisulat Niya sa yuta o abog, ug paghuman, Iya pod gitamakan sa Iyang mga tiil aron dili mabasahan sa uban.

Ing-ana ka mapinasayluon ang atong Ginoo. Sa atong mga ginahimo, ang mga sayop Iyang ginakalimtan, ug ang mga maayo natong binuhatan, maoy Iyang ginahinumdoman. Kana kung kita sab nagadawat sa Iyang kapasayloan, nga atong ginapangayo sa adlaw nga tanan.

Ang istorya ni Noe maoy nakahatag kanako niining ispirasyon, nga mabasa sa Genesis 6- 8. Sa pagkamakasasala sa tanang katawhan sa tibuok kalibutan, nakita sa Diyos ang Iyang pagkabuotan. Busa, Iyang gisugo si Noe nga maghimo og arka, aron sa lunop, masalbar siya ug ang iyang pamilya.

Paghuman pila ka mga bulan nga ang tibuok kalibutan giputos sa tubig, usa lang gayud ang makita sa tibuok kawanangan sa kalibutan- ang gamay’ng arka nga nagalutaw-lutaw.

Apan ang Genesis 8: 1 nagsulti og nindot kaayo nga mga pulong- “Ug ang Diyos naghinumdom kang Noe...”

Sa iyang pagkabuotan ug pagkamaayo, si Noe nakit-an sa Diyos. Ug alang kanatong mga nagapakita og pagkamaayo ug pagkabuotan, ang Diyos nakita kining tanan.

Ug kung naa man kita sa kapit-os ug kasablagan, nga sa lunop sa mga problema ug pag-antos kita nagalutaw-lutaw, hinumdomi kini: ang Diyos nagahinumdom kanimo.

Related Stories

No stories found.
SunStar Publishing Inc.
www.sunstar.com.ph