COTABATO CITY -- Nidilaab ang dakong sunog sa pampublikong palengke alas 12:20 sa udto, Biyernes, Mayo 24, sa dakbayan.
Sa taho gikan sa Bureau of Fire Protection (BFP-Cotabato City), kalit lang nga nagkalayo ang usa ka puwesto sa telahan sa Martinez Street, Supermarket area, sa dakbayan.
Mikatay dayon ang kalayo sa mga katapad nga stalls nga namaligya og ukay-ukay nga gama sa 40 porsiyento nga light materials o kahoy ug 60 porsiyento semento.
Nagresponde dayon ang kabomberohan gikan sa City Fire Bureau, uban ang Chinese Fire Brigade ug nagtinabangay aron makontrola ang kalayo.
Apan tungod sa kainit sa panahon ug kusog ang hangin, mas misamot ang kadako sa kalayo nga mikaon sa mga puwesto sa merkado publiko.
Gitaas sa BFP sa general alarm ang sunog hinungdan nga nagresponde ang mga firetrucks gikan sa probinsiya sa Maguindanao ug Bangsamoro Autonomous Region in Muslim Mindanao (BARMM).
Human ang duha ka oras nga kombati sa mga bombero, napawong na ang kalayo apan ugdaw na ang 13 ka mga stalls.
Gikanayon ni Fire Officer 2 Adrin Narra, tigpamaba sa BFP nga mokantidad sa P400 mil ang damyos sa maong sunog.
Nasayran nga nagsugod ang kalayo sa puwesto sa telahan nga gipanag-iyahan ni Abul Gapor sa 2nd floor sa old building sa supermarket area. (Edgar E. Fuerzas)