BALHOG karon sa San Pedro Police Station ang usa ka 25-anyos nga lalaki kinsa giakusahan nga maoy milugos sa menor de edad ug sa usa ka tomboy didto sa Barangay 8-A, Poblacion, Davao City.
Gisaysay sa usa ka alyas Neneng sa kapulisan nga misumbong kaniya ang duha ka biktima human sa panghitabo.
Ang suspek giila lamang nga alyas Edwin, 25, ug residente sa maong barangay kinsa igsuon ra sab sa tomboy.
Nasayran nga giingong namolestiya ni Edwin ang iyang igsuon nga tomboy dayon gisunod og molestiya ang menor de edad nga higala sa tomboy.
Gilayong girespondehan sa Women and Children Protection Desk (WCPD) sa San Pedro PNP ang maong hitabo hinungdan nga nasikop ang suspek.
Depensa sa suspek nga wala siya masayod sa pasangil, apan ang mga biktima milig-on sa ilang affidavit aron mapasaka ang kaso didto sa korte.
Ning kasamtangan nagtingkagol ang suspek sa selda sa San Pedro PNP.