Mga duwa karon Mayo 26, 2019
4:30 pm- Blackwater
batok Columbian Dyip
6:45 pm- Ginebra
batok Meralco
PAHUGTAN og suway sa Blackwater Elite ang ilang paggunit sa sayong liderato sa ilang pagpakigsangka sa Columbian Dyip sa premirong duwa karong hapon sa Philippine Basketball Association (PBA) Commissioner’s Cup sa Araneta Coliseum.
Ang Elite, nga kanunay nga mangiwit sa standing kaniadto, nag-una na karon human sila nagmadaugon sa nag-una nilang duha ka mga tahas batok sa Meralco Bolts, 94-91, ug Brgy. Ginebra Gin Kings, 108-107.
Nag-agak sa Elite ning maayo nilang pagsugod mao sila si Bobby Ray Parks Jr. ug import Alex Stepheson lakip na sila si Mike Digregorio, Mac Belo ug Allein Maliksi.
Si Parks nag-average og 24 puntos sa nag-unang duha ka mga duwa sa Elite samtang si Stephenson nag-average og 24.9 puntos.
Apan alang kang Blackwater coach Aris Dimaunahan, ang ilang teamwork ug pagtinabangay sa usa’g usa mao ang nakapadaog kanila sa nag-una nilang duha ka ka mga tahas.
“(It’s a) good feeling, positive atmosphere sa organization namin seeing them that way,” matod ni Dimaunahan sa interbyu sa PBA.PH.
Nidugang si Dimaunahan nga ang determinasyon sa iyang mga magduduwa nakatabang og dako sa ilang maayong kampanya.
“They have that mentality of not giving up,” asoy ni Dimaunahan kabahin sa iyang mga magduduwa.
“It’s in their system, it’s in their hearts. Hopefully, we can build on it and get another win on Sunday.”
Sa ilang bahin, ang Columbian Dyip wala pa nakatilaw og daog sulod sa duha ka mga duwa.
Ang mga pambato sa Columbian Dyip nga sila si import Kyle Barone ug rookie CJ Perez nagkinahanglan og dakong suporta gikan sa ilang mga kauban aron makabawon sa kasamtangan nilang sitwasyon.
Sa main game, magsangka ang Bolts ug Gin Kings.
Ang Bolts ni coach Norman Black ug Gin Kings ni coach Tim Cone nahilakip sa sayong mga gipangkonsiderar nga title contenders ning komperensiyaha.
Pareho man tuod silang nasubhan og kapildihan batok sa Elite apan gilaumang makabangon ra ang duha ka mga kampo sa pagpadayon sa ilang tagsatagsa ka tahas. (ESL)