Vallena: Sagolsagol

IKA 25 nga wedding anniversary namo sa akong asawa nga si Chelo, supervising producer sa Balitang Bisdak. Tungod kay naatol usab kini sa bespiras sa kapistahan ni Santa Rita de Cascia, busy siya.

Daghan sab ko og gilakaw kay anniversary lagi namo.

Samtang nag late lunch ko sa balay, nanawag nako ang among reporter, Arnold Bustamante, nga gipusil ang akong suod nga higala, Police Capt. Delfin Bontuyan. Igo ra kong nakahuman og paniudto, nilakaw dayon ko aron pagsusi sa iyang asawa nga si Myra. Pag-abot nako sa ilang balay, si Myra nga naghilak pa, nihangyo nako nga apason ang ilang bugtong anak, Talamban SK chairman Christine Claire Bontuyan.

Ka sakit sa akong naabtan nga esena. Galuom luom og hilak si Ching samtang nagtan-aw sa patay nga lawas sa iyang amahan nga suod nakong higala. Isip amahan ug nakahibawo ko unsa ka close ang amahan ug anak, gikumot ang akong kasingkasing nga nagsud-ong.

Kami ni Delfin makadaghan nang mga higayon nga nagkuyog og tungas sa bukid kay magbiseklita ug mangaon sa among paboritong linat-an nga baka nga sagad nag-aso pa sa kainit. Kon di man linat-ang baka, bisaya nga manok ang among kan-on.

Kon kamaayong tawo lang, wa ko makadungog nga dunay nisangpit ni Delfin sa amoa og sir. Part ang itawag sa iyaha, o kon di man gani, Delfin lang. Ang uban pa to nga pareho niyag ranggo, sir ang ipasangpit.

ATHLETIC

Grabe ang ka athletic ni Delfin. Gawas nga mobiseklita, moduwa siyag basketball ug tennis. Dihay maka usa, ingon pa niya nako, hapit siya makuyapi tungod kay daghan siya og giapilan nga sports sa usa lang ka adlaw.

Una ko niyang nagsige og saka sa bukid, pero wa ko makasuway nga nakaapas ko niya og tungas. Lahi nako nga sington lang og weekend, si Delfin hapit kada adlaw nagduwa og tennis ug basketball. Mao nang wa ko mahibung nga maggukod ko niya pirme og tungas. Nisamot na kog kalisod sa pag-apas dihang nag 29er na ko.

Karon, tungod sa iyang kamatayon, maghandom na lang ko sa among panagkuyog nga di boring, tungod sa kadaghan sa iyang mga estoryang kataw-anan nga mga kasinatian dihang batan-on pa ug pipila ka kataw-anan nga mga police operation.

My friend, rest in peace.

PASINGOT

Dunay mga pagtuon nga nagpakita nga duha ang response sa tawo nga mag middle age crisis. Ang usa, negative samtang ang usa positive. Ang usa nga positive mao ang pag-ehersisyo og maayo. Unconsciously, gusto kang kanunay healthy. Mao kuno ni ang hinungdan nga daghan sa middle age ang makatultol og gym.

Kini akong paghilig sa biking midlife crisis diay ni?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph