DILI mawagtangan og proyekto si Sue Ramirez labi na sa pelikula ug swerti kaayo ang actress kay usa ka Kpop star ang bag-o ining makapareha nga si Shinwoo sa Korean boy group nga Blanc 7.
Matod sa aktres cute ug buotan ang iyang leading man gawas nga daghan sab siya og nakat-onan mahitungod sa Korean entertainment industry ug kon unsang klase kini ikatrabaho.
Ang "Sunshine Family" istorya sa usa ka tipikal nga Filipino family diin gipakita dinhi kon unsa kita ka positibo sa kinabuhi.
Ang pelikula gi-shoot tanan sa Korea ug makauban nilang Sue Ramirez ug Shinwoo dinhi silang Marco Masa, Nonie ug Sharmaine Buencamino.
Hatud kini kanato sa Spring Films ug Filmline Productions nga showing na sa mga sinehan karong Hunyo, ay'g saba!
Ang "Quezon's Game" daghan nang mga award nga nadawat. Unsa kahay nagpaluyo sa istorya dinhi ni presidente Quezon nga gidala ni Raymond Bagatsing ug sa iyang first lady nga si Rachel Alejandro?
Nakuryoso ko kon unsay ilang kalambigitan nila sa panahon ni "Hitler" nga maoy akong nakita ug nasabtan sa trailer sa "Quezon's Game" ay'g saba!
Human ni Sharon Cuneta sa "Kwaresma", laing horror movie na usab ang mosunod, ang "Clarita" ni Jodi Sta. Maria gikan sa Blacksheep production.
Sa direksyon ni Derick Cabrido, si Jodi na usab ang mohadlok sa mga moviegoers kauban silang Aaron Villaflor ug Ricky Davao.
Inspired kini sa mga tinood nga panghitabo labi na mahitungod sa kayawan-on sa matag usa kanato, ay'g saba!
Panahon ron sa mga pista sa probinsya ug ang bandang "Cueshe" ang mag- konsyerto dire sa pista sa Poblacion Talibon, Bohol diin ko malipayong nakapamista. Mapasalamaton ko sa pamilyang "Gatchalian" labi na sa magtiayong Andres ug Pingping ug sa ilang mga anak Mary Jean, Maria Fe, Marichu, Maricris, Jenny ug Kevin uban usab sa ilang isig ka pamilya.
Salamat sa maayo ug mainit nga pagdawat kanako sa inyong kapistahan. Malipayong pista Talibon, Bohol sa ilang mahal nga patron Santisima Trinidad... Ay'g saba!