MISANG-AT og election protest ang kampo ni kanhi mayor ug Kongresista Arturo ‘Boy’ Radaza batok kang mayor-elect Junard ‘Ajong’ Chan gumikan sa matod pa missing votes sa 84 ka mga clustered precincts. Apil usab nga mi-protesta si Vice Mayoral candidate Harry Radaza, kinsa naparot ni vice mayor elect Celsi Sitoy, ang runningmate ni Chan. Laing rason sa mga Radaza sa ilang protesta mao ang pagkaguba o wala mo-function nga mga vote counting machines nga walay klarong mi-ihap sa mga boto.
Well, katungod man kana sa mga Radaza nga mosang-at og protesta. Apan dili sa pagbubo og bugnaw nga tubig sa ilang kahigwa-os nga mangita og hustisya sa ilang na-angkon nga kaparutan, kuti, hasul, hago ug gastus kining mo-file og election protest. Gawas nga maabtan tag siyam-siyam, walay kasiguruan nga modaog ang mga nagprotesta. Adto pa ni magdaug inig doul na usab ang eleksiyon. Ang pangutan kon ang boto sa 84 precincts maka-apas ba sa labaw ni Chan nga 19 mil ka botos?
Ang nag-protesta maoy mogastu sa tanan. Apil na ang pagdala sa mga balota sa kauluhan ug pag-ihap. Base sa akong nahibaw-an, sukad nga na-computerized ang atong eleksiyon, wala pay mi-protesta nga nakadaug. Kay ngano man? Una, Comelec ang imong kontra. Kon padag-on sa taga Comelec, posible baya nga ma-kuwestiyon ang ilang kredibilidad ug ang vote counting machines. Sa ato pa diay, dili credible ang ihap sa ilang vote counting machines kay palpak man.
Daghang mga protesta nga misaler sama niadtong kang Tining Martinez batok ni Benhur Salimbangon. Pero manu-manu pa ang botasyon niadto. Apan daghan usab ang wala. Sumala si Mike Rama wala na mopadayon sa iyang protesta batok sa ‘kanhi laos nga pulitiko’ human siya mapilde niadtong 2016 elections diin gilubong siyag 35 mil butos.
Ang angay himuon ni Boy Radaza nga iya nalang dawaton ang kamatuoran nga pilde siya kay ang mga lomulopyo sa Lapu-Lapu City wa na makagusto kaniya gumikan ba kaha sa kahimtang sa iyang panglawas. Mas maayo pa nga kanang iyang igasto sa protesta, iyang tigumon aron igasto sa sunod nga eleksiyon. Kana kon maayo pa iyang lawas. (bobbygnalzaro@gmail.com)