GIHISGUTAN ni Mayor-elect Edgar Labella nga sugdan na sa di pa matapos ning tuiga ang pagtukod sa Light Rail Transit (LRT) sumala sa gisaad kaniya sa nasudnong kagamhanan. Hayan tinuod na ni kay mas duol si Labella sa national government kay kang outgoing Mayor Tomas Osmeña.
Gawas sa LRT, ipadayon sab ang Bus Rapit Transit (BRT) kay tipik kini sa nagkadaiyang mga public transport nga gipaabot nga makasulbad sa grabeng suliran sa trapiko sa Sugbo.
Ang BRT sugdan na unta pipila ka tuig ang nakalabay ug matapos unta sa miagi pang tuig. Apan bisan usa na lang ka estruktura alang niini, wa pay makita. Di lang kay paspas ang kausaban sa kahimtang sa gidaghanon sa mga sakyanan, naigo usab kini sa away sa pulitika dinhi.
Ning kadaugan ni Labella, hinaut pa unta nga mao na ni ang kahayag nga gipangita sa mga Sugboanon alang sa pagtapos na sa dugay na kaayong kalbaryo sa karsada. Sa termino man gud ni Osmeña, iyang giputol ang pakiglambigit sa bisan unsa nga grupo o organisasyon nga maghisgot og mga imprastraktura, apil na niini ang trapiko.
Mag-unsa man ang dagkong mga proyekto nga motadlas sa Metro Cebu kon ang Cebu City way partisipasyon? Sentro sa Metro Cebu ang Dakbayan sa Sugbo hinungdan sa kamahinungdanon sa iyang papel.
Pun-an pa sa di maayong relasyon ni Osmeña sa pipila ka impluwensyadong mga opisyal sa Duterte administration, lisod ang pag-irog sa mga proyektong pang transportasyon. Giawayan pa unsay mas haum nga transportasyon, LRT o BRT.
Karon nga mawala na si Osmeña, hayan paspas nang moirog kining LRT ug BRT kay si Labella naila man nga naa sa administrasyong Duterte. Mismo si Presidente Rodrigo Duterte nangunay sa pag-endurso kaniya.
Hinaut pa nga kining kalbaryo sa karsada karon sa mga Sugboanon, matuldokan na.