BABATNGON, Leyte - Namatay ang usa ka lalake human naigo sa kilat samtang nanagat sa kadagatan sakop sa District 1 ning lungsod niadtong Huwebes sa hapon, Mayo 23.
Giila ang namatay nga si Diosdado Sabenorio, 58, taga Barangay Tinaogan, Basey, Samar.
Matod sa kapulisan, si Police Staff Seargent Romulo Tabique nagpahigayon og mobile patrol sa dihang nadawat ang impormasyon.
Ang igsuon sa biktima nga si Rolando Sabenorio ang ni-report sa kapulisan.
Base sa imbestigasyon, nisugilon ang igsuon nga alas 5 sa hapon, Huwebes nanagat silang duha ni Diosdado.
Atol sa ilang panagat, usa ka makusog nga kilat ang niigo kang Diosdado.
Nakaangkon og daghang paso sa lawas ang biktima.
Gidala si Diosdado sa Municipal Health Office sa Babatngon, apan gideklarar ni Dr. Julieta Conge nga patay na. (JKDP)