UYON ang hepe sa Police Regional Office 7 sa tinguha nga ibalik ang mandatory Reserve Officers Training Corps (ROTC) sa senior high school.
Matod ni Police Brigadier General Debold Sinas dako og matabang ang maong programa sa mga tinun-an ilabi na sa internal discipline.
Gawas sa disiplina, mabansay usab sila sa disaster preparedness gumikan kay kadaghanan sa mga tawo karon wa masayod unsay buhaton kon adunay moigo nga kalamidad.
“Ako nag CAT ko, nag ROTC ko. Murag gwapo man nga moagi ka ana kay that is one how you develop katong internal discipline. Malay mo kon naay mahitabo by disaster, mao na daling i-organize,” matod ni Sinas.
Gusto gani niya nga bisan sa mga junior high school ipaubos sa training.
Gisalikway usab niya ang mga pagduda sa pipila ka mga militanteng pundok nga gihimong pangwarta lang sa mga opisyal sa ROTC ang programa.
Matod sa heneral nga kon ang tawo ang problema, ang tawo maoy tangtangon, dili ang programa.
Si Diane Angel, taga Labangon, Siyudad sa Sugbo, tinun-an sa Abellana National School, uyon sa pagbalik sa ROTC.
Alang niya maayong adunay disiplina ang mga estudyante.
“Ingon sa akong papa nga maayo daw nang CAT ug ROTC kay silang tanan nakaagi man sila ana. Gusto pud ko mo try kay ang plano nako magsundalo ko pagdako,” si Angel niingon. (AYB)