LABIHAN ang kadismaya ni John Simon, ang port collector sa Mindanao International Container Terminal (MICT), nga sa laing higayon aduna na usab mga basura nga nakasulod dinhi sa Tagoloan Port, lungsod sa Tagoloan, Misamis Oriental.
Kini human iyang gikumpirmar nga mokabat sa pito ka mga 40 footer container van nga “misdeclared municipal trash” gikan sa nasud sa Australia ang nahidangat dinhi sa nasud niadtong Mayo 7 ning tuig.
Dihang gisusi kini niadtong Mayo 14 nakumpirma anga laing mga basura na usab nga gitawag sa importer nga processed engineered fuel nga basi sa Customs Modernization and Tariff Act, ang PEF walay labot sa listahan sa mga imported materials nga makasulod sa nasud sa Pilipinas.
Gikumpirma sab ni Simon nga ang consignee mao ang Holcim Philippines Incorporated nga usa ka kompanya sa semento nahimutang sa lungsod sa Lugait.
Gipasabot ni Simon nga ang municipal trash usa ka basura nga makita sa daplin sa kadalanan sa matag lungsod ug niingon nga kinahanglan nga mag-coincide ang tariff classification sa gideklarar.
Nagpahigayon na usab og inspection ang Environmental Management Bureau (EMB) sa Department of Environment and Natural Resources (DENR) ug nakita nga nagkalain-laing klase sa plastic, wrappers, cellophane, fibers, wood textiles, papel ug uban pa nga gipino pino.
Nagpagawas sab og pahayag ang Holcim Philippines Inc. nga ang maong materyales nga karon gi-hold ang tinoud nga gideklara.
Si Simon suk-anon kaayo ug dismayado sa niabot nga mga basura.
“Sa lahat ng gustong magpasok ng basura, pwede kayong magtago pero hindi kayo makakalayo. hahabulin ko kayo, pipigilin ko kayo at aking ipipilit na ang bansa natin hindi basurahan, ang bansa natin ay isang bansang malaya at hindi tapunan ng basura ng ibang bansa,” matud ni Simon.
Padayon pa usab ang imbestigasyon niini karon panahona hilabina nga basi sa Department of Environment and Natural Resources (DENR) executive order 2010-06 nalatid nga dili na kinahanglan og importation clearance gikan sa DENR kung mag-import og processed waste materials nga maoy gamiton nga alternative fuel sa paghimo sa semento.
Apan pagklaro sab ni Simon nga dili kinahanglan nga kuhaon kini gikan sa laing nasud hilabina nga ang Pilipinas adunay daghang basura.
Kahinumduman nga niadtong niaging mga bulan niabot usab ang basura gikan sa nasud sa Korea gani wala pa kini hingpit nga nabalik lakip na ang mga basura gikan sa Canada.