GILABAY sa giingong arogante nga drayber ang plete sa pasahero kini human nga gireklamo nga gipanilngan og dako nga pamasahe niadtong Mayo 24 diha sa pier terminal paingon sa dalan Quirino, Limketkai drive, Siyudad sa Cagayan de Oro.
Ang nagreklamo naila nga si Jeanly Sarranz, 24, dalaga, taga Pinikitan, Camaman-an ning siyudad samtang ang wala maila nga drayber nagmaneho sa RBC pier liner nga multicab nga nagdala sa numero sa plaka nga LNK 466.
Sa nahipos nga impormasiyon gikan sa kapulisan sa Police Station 2 (PS2) sa Cogon giingong nireklamo si Sarranz ug nagpakitabang sa traffic enforcer nga si Marvin Bahian sa Road and Traffic Administartion (RTA).
Giingong nagreklamo kini human gipangayuan og P50 alang sa iyang plete gikan sa pier terminal paingon sa Limketkai drive nga unta anaa lamang sa regular nga pletihan ilabi na nga dili usab kaayo kini layo apan nasuko pa ang drayber ug gilabay ngadto na kay Sarranz ang iyang kwarta.
Ang maong insidente ang nakatala na sa buhatan sa kapulisan ug giduso sa Land Transportation Franchising and Regulatory Board.