NAGPAHIGAYON og misa ang nagkadaiyang unit sa kapulisan alang na usab sa daling pag-ayo ni City Director Police Colonel Nelson Aganon human na aksidente niadtong Mayo 22 diha sa parade ground sa Barangay Patag ning siyudad sa Cagayan de Oro.
Kahinumdoman nga grabe ang pagka-aksidente ni Aganon sa dihang nagpahigayon og pre-jump riding kalabot na sa motorcycle riding course kinsa giingong nakitaan og traumatic head injury human sa computerized tomography (CT) scan kinsa usab na-operahan balik niadtong Mayo 23.
Nasayran nga niadtong adlaw nga Biyernes, Mayo 24 nagpahigayon og misa ang Cagayan de Oro City Police Office (Cocpo) lakip na ang Regional Mobile Force Battalion (RMFB) diin nakaserbisyo usab si Aganon kaniadto isip kumander.
Samtang ang matag estasiyon sa kapulisan sa Cocpo sa siyudad naghatag usab og panahon aron sa pagdalit og pag-ampo alang sa daling pagkaayo ni Aganon kinsa nagpabilin pa sa Intensive Care Unit (ICU) sa pagsulat niini nga balita.