NAGPAHIMANGNO ang tinugyanan sa City Local Environment and Natural Resources Office (Clenro) kalabot na sa usa ka bulan nga dry run sa "No Segregation, No Collection policy" nga sugdan na karong Hunyo 1 sa Barangay 1 hangtod sa Barangay 40.
Kini lakip sa hugot nga implementasiyon sa City Ordinance nga Integrated Ecological Solid Waste Management Ordinance no. 13378-2018.
Gibutyag ni Engineer Armen Cuenca, pangulo sa Clenro, nga kinahanglan nga dunay oras diha sa pagkuha sa mga basura sama sa mga malata ug mga basura nga mapuslan pa.
Nasayran nga ang usa ka bulan nga pagsulay niini nga polisiya aron masuta kun unsa ang kakulangon aron mahingpit na nga pagpatuman niini karong Hulyo 1.
"Unsa man gani ang kinahanglan e-adjust, kinahanglan buhaton aron epektibo ayha dayon nato i-full force og implement alang sa urban barangays, Barangay 1 to 40 karong July 1," matud ni Cuenca.
Gipasabot niini nga kinahanglan nga ilain na ang mga basura nga malata ug sa mga mapuslan pa diha sa mga panimalay ug ipagawas lamang sa gitakdang oras sa pagkolekta aron nga dili na susama kaniadto nga wala gihapon kini pulos tungod kay sa pagkolekta isagol ra gihapon diha sa garbage truck.
"Initially ang atong kolektahon sa buntag nga oras bisan sa 8:00-5:00 ang mga malata pagkagabii kadto na dayon ang mga wala nay pulos nga mga basura nga ato ng pwedi nga ilabay sa sanitary landfill," dugang niini.
Gidugang pa niini nga posible usab nga maapil ang laing upat ka mga Barangay diha sa dry run apan tun-an pa kung mahimo na kini.
Giingong wala unay multa panahon sa dry run sulod sa usa ka bulan ug badlungon ang makasupak niini apan sa sunod nga utrohon gihapon niini dili kini kolektahon ang iyang mga basura samtang sugod sa Hulyo 1 duna nay multa nga P500.