NASULOD ang partylist nga Ako PaDayon Pilipino human pormal kining giproklamar sa buhatan sa Commission on Election niadtong Miyerkules, Mayo 22 ning tuig.
Sa mokabat 134 ka mga partylist nga nagpapili tibuok nasud, nasulod ang partido sa Ako PaDayon Pilipino nga gikan sa Mindanao nga anaa sa ika 39 sa listahan kon asa nakakuha kini og 234, 846 nga boto.
Dinhi sab sa Misamis Oriental nag-number one kini human nakakuha og 43, 806 nga boto.
Representante niini mao si Adrian Ebcas kinsa general manager sa Camiguin Electric Cooperative.
Una na nga gikumpirmar ni Misamis Oriental Governor Bambi Emano nga ang Ako PaDayon Pilipino Party-list gitugotan sa ilang partido nga mahulaman sa mga electric cooperative sa tibouk Mindanao kini tungod kay hinay-hinay nga nangawala ang mga electric cooperative sa nasud tungod sa mga pribado nga dili mokutay og kuryente kon lima lang ka bubong kay molantaw og ginansya nga dinagko.
“Kun inyong namatikdan hinay-hinay na nga gipapha ang mga electric cooperative sa atong nasud ug ang nahitabo ehemplo daghan kaayo mga tao nga nagtrabaho diha kon makaptan sa pribado dili mokutay sa lima ka bubong ilang gilantaw ginansya man,” dugang niini.
Dili susama sa electric cooperative nga bisan pa napulo ka ektarya ang kalay-on ug pila lamang ka bubong ug makadawat dayon sa pundo gikan sa nasyonal ila gyod kini nga makutayan.
Sa pagkasubli niini gilaumang nga kini nga partido magdala og kaayuhan ug patas nga pag apod-apod sa kuryente ingon man mga problema karon sa kuryente nga giatubang dili lang sa Misamis Oriental apan sa tibouk pulo sa Mindanao.