BAGUIO

Luzano: Otso Deretso nababtuog!

Karit Ken Kayetket

KASLA kano nababtuog a bunga ti niyog ti nababriit a nagpasaran dagiti kandidato ti oposisyon – “Otso Deretso”. Ditay ammo no daytoy ket maysa a kantiyaw wenno kidag manipud kadagiti simmursurot kadagiti agkakawil a binrsakan iti pitak iti kallabes a basingkawel. Adu ngamin kadagiti napaspasagidan a ka-brigada Duterte ti nangsirot iti sentronda sakbay iti eleksiyon tapno mayadayo dagiti kontrobersiya iti mas nabarbara nga eksena. In short...adu kadakuada ti nagpaspasensiya. Naibukbok laengen, kunada ti rurod ken kaririknada idi addadan iti orna wenno pagbutosan. Resulta: na-“bokya” ti “otso deretso”. Kayatna a sawen, awan nakastrek nga uray maysa kadakuada iti “top 12” a naiproklaman itay kallabes a Mayo 22. No alaentayo iti mas narabrabaw a pannarita-Iluko...ti napasamak ket

makuna a – “napongak”.

***

Sakbay nga agaapakayo, este, pagrusingan iti riri dagiti pinnasagid ken keddel...intay man met biit sirpaten dagiti napapateg a paspasamak itay kallabes: Kas koma iti burburtia a kasla kayatdan san a mapasardeng ti K to 12 Program? Maryusep! No kaano a naannayasen ti tarayna kadagiti pagadalan ken agad-adal...sada nalagip a paisardeng? Nagtaudan aya ti damag? Sukimatentayo. Kuna ti Department of Education (Dep-Ed), awan kano ti planoda a mangibasura wenno mangisardeng iti implementasyon ti K to 12 Program. Kas pangilawlawag ti Dep-Ed...nagkammali laeng kano iti interpretasyon dagiti sumagmamano a taga- Commission on Higher Education (CHED) a planoda kano a maipasidong iti “review” ti sistema ti K to 12 Program. Impasingked ti DepEd ti K to 12 Program ket naipasngay babaen iti Republic Act No. 10533 wenno ti “Enhanced Basic Education Act of 2013” isu a saan a basta-basta a maibasura daytoy. Innayon pay ti DepEd a ti pannaka-imyenda wenno pannakawaswas iti linteg a nakaibasaran ti K to 12 ket addan iti ima ti Kongreso no ania ti pinal a pangeddeng. Iti agdama, adda 2.7 milyon nga estudyante ti agnumnumaren iti nakuna a programa. No maisardeng daytoy, nadagsen ti negatibo nga epektona iti sistema-edukasyon ti pagilian. Awan pay ti masirip a plano ni Pres. Duterte panggep iti nakuna a plano a pannakaisardengen tin K to 12. In short: tuloy latta ti K to 12.

***

Duapulo ket pito a kandidato a nakalista iti Norcolist ni Pres. Duterte...nangabak itay kallabes nga eleksiyon. Adu a kurimatmat ti natnag. Kasano a napasamak ti kasta? Nairakurak langaruden ti nagnagan dagita a kandidato, apay a nangabakda pay laeng? Kuwarta kadi wenno ania? Intay man adawen ti nakuna met ti kapulisan iti daytoy a banag: umuna iti amin, uray pay nangabak dagitoy nga adda iti narcolist...agtultuloy latta ti pannakasursurot ti addangda panggep iti pannakairamanda iti drug trade. Kunada...mabalin nga iti naglabas a panagtakem kano dagitoy a pulitiko, adu met ti nagappuananda. Dagita ti nangiduron kadagiti botante tapno suportaranda manen dagitoy. Kuna met dagiti adda amakna: amangan ta kumarkaron ti panagraira iti illegal a droga iti sakupda tangay binotosan ken pinangabak ida dagiti residente. Amangan ta ipagpannakkelda pay ketdi a saan a pudno ti pannakairamanda iti narcolist agsipud ta nangabakda. Iti report ti pulisya, adda 47 nga opisyales ti gobyerno (mayor agingga iti gobernador) ti nairaman iti Narcolist; 37 kadakuada ti kimmandidato; ket 27 kadagitoy ti nangabak. Sabagay, ammon dagiti otoridad ti maiparbeng ken maikaniwas.

***

Kasla gurruod a gimluong ti damag a naglusulos a presidente ti Liberal Party (LP) ni Sen. Kiko Pangilinan. Kasla kimat met a nangagsiit dagiti espekulasyon, salsaludsod kada tsismisan. Umuna a saludsod: apay a nag-resign? Gapu kadi ta “naibbong” ti “otso deretso” nga isu ti mangtimtimon sipud pay panagkakampanya? Siyento porsiyento pards a naalam ti husto a sungbat. Kas linaon ti surat ni Sen. Pangilinan...kinunana a naglusulos daytoy gapu iti pannakaabak dagiti amin a kandidato ti Otso Deretso a binsagan ti social media nga “zero diretso”. Ket gapu ta isu ti agsirsirbi a kas campaign manager, kayatna kano nga awaten ken ibaklay nga agsulsulo ti “full responsibility” iti pannakailampaso dagiti pambato ti oposisyon. Kinuna ti senador a gapu ta dina naipangabak dagiti tauda iti “otso deretso”, por delikadesa, naglusulos daytoy nga agipekto inton Hunyo 30, 2019. Ngem saan nga inawat ni Vice President ken Liberal Party Chairman Leni Robredo ti resignasyon ni Sen. Pangilinan ken ni Quezon City Rep. Christopher Belmonte a kas secretary general ti LP. “The Vice President has not accepted Senator Kiko’s and Cong. Kit’s resignation. Much work remains to be done, and they will do it together,” ti nakuna ni Atty. Barry Gutierez, spokesperson ni Robredo. Kas kuna ngarud ni Leni – “Walang Aalis!.” No sibibiag koma daydi lolok, apo unay ngatan a sakuntipna. Amangan ta idayamudomna nga: awatenyo ngaminen a nakapsut a talaga dagiti impasungalngalyo iti “otso deretso”. Didanto pay nakamatan ni Lito Lapid a maysa laeng nga artista? He he..lolo...ni Lapid ket pinasikat kano ti Probinsiyano. Ket no isingitmo ni Bong Revilla...sabali isuna, lolo ta nalaing kano nga agsala. Relaks ka lang lolong...urayem no ania dagiti sumaruno nga eksena idiay Senado ta adda babbaro a kaduada kas kada Bong Go, Bato ken Imee.

***

Subliantayo ti tema. Apay...ania aya ti karisma wenno pigsa ni Digong ta kasta ti napasamak iti benneg ti “otso deretso”? No intay lagipen dagiti naglabas a surveys...nabatad dagiti resultada nga iti likud dagiti basnotda kenni ni Pres. Duterte, ngimmato pay ti satisfaction ratings ken approval ratingsna. Dagiti umilin ti mismo a nangkumpirma a anamonganda ti pangituray ni Digong iti agdama. Ad-adu kadagiti napagamadan ti nagkuna a mapnekda iti estilo ti panangidaulona iti pagilian. Uray gimmiddan dagiti adu a panangirurumen ken panangbabalawda iti presidente, kasla saan a namati dagiti umili no ibasar iti resulta dagita a surveys. Ammo ngaminen ti kaaaduan a kumtat dagiti pammabalaw gapu iti kinaadun dagiti programana a pagnamnam-ayan itan ti pagilian. Siguro, kunada...no nakapsut dagiti iganggannuatna a programa...mabalin a nakapsut met ti suportada kadagiti enyendorsona idi eleksiyon. Dagitoy ken adu pay a gapu ken rason no apay nga agtultuloy ti suportada kenni Pres. Duterte itin likudan dagiti negatibo a komento.

***

Ti resulta ti eleksiyon itay kallabes ket kas kalawag ti sirnaat ti init, pards. Nangeddengen dagiti umili base iti naamirisda a pagimbagan ti sangapagilian. Ammon dagiti umili a no agtultuloy dagiti kontra-konsepto ti administrasyon, amangan ta nakarkaro nga agtinnagtayo iti kasipngetan. Saanen a kasapulan ti panagriri wenno panagsisinnidir no di ketdi panagkaykaysa tapno masaluadan ti masakbayan ti pulitayo. Kaudianna...nalpasen ti basingkawel....agkaykaysatay koman. Lipatentayon ti sinnakit ti nakem a pinarnuay ti pulitika. Agiinnabrasatay ketdin a sangsangkamaysa.

Adios mi amor, ciao, mabalos!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph