Cesar Albor

Sandiganan

GUMIKAN ba kaha kay hugaw na kaayo ang kadagatan sa Talisay City, ang mga mangingisda adto na managat sa kabaybayonan sa Cordova.

Dihay mga higayon nga nagkaengkwentro ang mga Bantay Dagat sa Cordova ug ang mga illegal fisher sa Talisay, sumala pa ni Konsehal Roque Yburan, Chairman sa Committee on Peace and Order sa lungsod sa Cordova. Nahinumdoman hinuon nato nga ang Cebu City buot moilog sa reclamation project nga hurisdiksyon sa Talisay samtang ang Talisay mangilog sa dili nila baybayon.

For updates from around the country, follow Sun.Star on Twitter

* * *

Isdaanon kaayo ang kadagatan sa Cordova kay legal man ang ilang panagat sama sa pamasol, panudsod, panginhas, bungsod ug panggal. Disiplinado sila gumikan sa political will ni Mayor Adelino Sitoy nga nagpangga sa mga bahandi sa kinaiyahan. Gani, malambuon ug makalingaw ang talan-awon sa ilang kalikupan sama sa fish ug bird sanctuaries. Haom sa giingon “a thing of beauty is a joy forever”.

* * *

Samtang buot molunggob sa laing baybayon ang taga Talisay, illegal pa gyud ang ilang panagat sama sa dinamita, liba-liba, compressor, kubkob, trawl ug ang pino nga mata sa pukot. Nakigpinusilay sila sa mga pulis ug bantay dagat sa Cordova kay sila armado ug pulidog sakyanan sa kadagatan. Wala makadasdas ang kaliwat ni Lapu lapu apan padayon nilang giduphan ang kabahandianon sa ilang baybayon.

* * *

Nakaimbento diay ang mga illegal fisher sa Talisay og dinamita nga dunay silencer, sumala pa ni Bebot, usa sa mga mananagat sa Cordova. Ang maong dinamita dili na mosipa ang buto, adto na kini hilom nga mobusikad sa ilawom sa dagat. Tungod niini, ang mga bantay dagat dili na makabantay. Anha na nila mailhi nga dunay illegal nga nanagat kay ang mga langgam kanunay magpanon ug mohugop sa pagpangaon sa mga isda nga naglutaw-lutaw na sa halapad nga aping sa kadagatan.

KWARESMA NA

Naglakat na ang kwaresma hangtod nga mahatukma kini sa mahal nga adlaw, ang pasko sa kasakit. Ang atong Ginuong Jesukristo ilansang sa krus sa bukid sa Golgotha. Kini ang kalbaryo, bungtod sa kasakit, pungtod sa pag-antos, uhaw sa tubig, haw-ang sa kakahuyan ug bantang sa makapaso nga kainit sa adlaw. Apdo ug suka ang gipainom sa mga Hudeyo ngadto sa nagtinga nga si Jesus. Wala malisang ang atong Ginuo samtang gipangawras sa maitom nga kuko sa kamatayon aron pagluwas kanatong nga makasasala.

* * *

Naglagiting ang kainit nga daw makapaso ang kahulogan sa kwaresma. Karon gitawag og El Niño, didto sa among bukid gihulagway kini nga taas nga hulaw. Apan ang dakong kwaresma mao ang naandang gawi sa mga pulitiko nga naglabi ang sulti kay sa buhat. Dunay pulitiko nga nagsapot og biste sa tawo apan hayop diay og balatian.