Compio: Gibanhaw sa kamingaw
DUNAY mga tawo nga usahay mingdaklit lamang sa atong kinabuhi, ug sa mga panahon nga di nato matuyo, subli silang banhawon sa atong panumdoman.
Palis niadto, nagpa-uraray ko sa paglingkod sa bangko sa landong sa ikatulong andana dapit sa among hayhayan, nanganaw-kanaw akong paghinuktok nga nagsud-ong sa halayong dapit kutob sa maabot sa akong panan-aw.
Bugnaw kaayo ang hangin nga gikan sa kadagatan labi na kung mga alas dos sa hapon didto sa taas sa balay nga nag-atubang sa Davao Gulf, sa Piapi Boulevard.
Naghinuktok ko, apan nagdula sa akong hunahuna ang daghang mga panghitabo sa kinabuhi nga sarang maoy nakapasadya ug nakapahilak nako sa mga nanglabay nga mga katuigan.
Di man nako masaysay ang tanan, apan mopaambit ko sa usa ka kasinatian nga maoy naghatag nako'g dakong kadasig kung paunsa nabanhaw pag-usab ang usa ka pinasahing pagbati.
Maingon nako nga pinasahe, gumikan kalit siyang miabot kanako ug kalit ra sab siya nga nawala, daw sama sa bula nga makita ang iyang kaanyag sa mga nagkadaiyang kolor apan sa segundo lamang.
Hinuon, miabot man sa halos duha ka bulan ang among panaghigalaay, gani midangop siya nako sa iyang mga tahas sa eskuwelahan ug natabangan nako siya sa paghuman niini.
Human sa klase, nananghid siya, nagpasalamat sa mga nahimo nako diha niya, minghawa siya sa iyang giabangan nga balay, ug ming-uli na sa ilaha sa Digos City.
Hinuon nagpasalamat ko niya tungod siya ang nagtudlo nako paunsa mahigugma sa usa ka butang nga bisan sa paglabay sa mga panahon nagpabiling mipuyo sa kasingkasing.
Usa ka adlaw pag-abli nako sa akong wall sa Facebook, gipanghambog ko niya sa akong nahimo ug nananghid sa tanan nga mopahuway na siya, subo man, apan nadawat ra ang kamatuoran.
Didto na nako nasuta sa iyang ig-agaw nga nagtungha sa University of Mindanao nga wa na suma pa nakaya sa akong higala ang iyang gidala nga colon cancer nga wa nako nasayran niadtong nag-uban pa mi.
Dihang nasayran nako, bug-at kaayo nga dawaton ang maong kamatuoran, tungod kalit ra nako nga nasayran nga nagdahom ko nga naa pa siya sa unahan, pero sige lang kaysa mag-antos pa siya.
Gani sa mga hulagway nga gipakita sa iyang ig-agaw diri nako, naa pa ang akong pangalan ug mga hulagway uban sa among mga barkada sa basketball team nga iyang gihangyo nga dalhon kung siya mamatay, tuod man, gipadala gyud nila.
Usa ra gyud akong masulti nimo, higala, daghang salamat sa mga butang nga imong gipakat-on nako, magpabilin kang buhi sa akong panumdoman.