NAKURAT ang mga investors sa advisory nga gipagula sa Securities and Exchange Commission (SEC) nga giisyu niadtong Mayo 24 batok sa pag-invest sa Rigen Marketing gumikan alegasyon nga nahulog na kining usa ka dako nga pagpangilad kun “fraudulent investment scheme.”
“The public is hereby advised to exercise caution in investing their money in these types of schemes which may also turn out to be fraudulent investment schemes, involving the sale of unregistered securities,” sa natala sa advisory.
Giingon nga ang SEC nakadawat og mga impormasyon nga dunay mga indibiduwal ug mga grupo kinsa nagpaila nga sila taga Rigen Marketing nga nagdani sa publiko aron nga mo-invest niini nga money investment pinaagi sa walk-in solicitations.
Dugang niini, gipasabot sa SEC nga kung kinsa man ang mga mareklamo ug madakpan nga mga tawo nga midani sa publiko aron moapil niini nga mga investment schemes, dunay pagatubagon sa balaud kinsa mapriso sud sa 21 ka mga tuig ubos sa Section 28 sa SRC ug makamulta og P5 million ubos sa Section 73 sa SRC.
“Those who act as salesman, brokers or agents of Rigen in selling or convincing people to invest scheme being offered, including solicitations or recruitment may likewise be prosecuted,” giingon sa advisory.
Dugang pa niini, “Likewise, those who sell or offer securities to the public, may be held criminally liable or accordingly, sanctioned or penalized pursuant to the Supreme Court Decision in the case of Securities and Exchange Commission (Sec) vs. Oudine Santos (G.R. No. 195542, 19 March 2014).”
Buot gipasabot sa maong advisory nga makunhuran na ang mag-invest sa Rigen ug sa bisan unsa nga matang sa money investment schemes ngari sa Davao Region, gumikan gitan-aw nga ang nakapakusog niini kadto mang mga tawo nga maayo kaayo mamulong aron madani ang inosente.
Lamang wala gyod seguro'y mapriso niini gumikan mahadlok man moreklamo ang mga investors kay nasayod nang daan sa risgo pag-abot sa panahon kung unsay mahitabo sa kompanya nga ilang gisudlan.
Ang maayong himuon niini, angay nga dunay trabaho ang matag usa, di magsalig sa kalit ug dako nga tubo sa kuwarta, -- di nalang molihok; kay ang tanang investors wala gyod nasayod kanus-a kini mahugno.