DAVAO DEL SUR -- Gipadayag sa tagdumala sa Rigen Wellness Product Marketing-Matanao Branch nga wa'y angayang kabalak-an ang mga sakop niini sangkit kompleto sa permit ang ilang kompanya.
Gipakita sab sa sanga nga buhatan ang ilang permit ug lisensya.
Giingong nakarehistro ang Rigen Wellness Product Marketing sa Department of Trade and Industry (DTI) ug sa Bureau of Internal Revenue (BIR).
Gawas niini, aduna sab business permit ang kompanya gikan sa lokal nga gobyerno diin mibayad og tax nga dul-an tunga sa milyon.
Matod sa tagdumala sa kompanya nga di ilawom sa pagduma sa Securities and Exchange Commission (SEC) ang maong kompanya sanglit usa kini ka sole proprietorship ug di ilawom sa organisasyon, relihiyon, korporasyon o inkorporasyon.
Nanaghap ang nagdumala sa kompanya nga daghan ang gustong miguba kanila sanglit daghan na ang buot moapil sa maong negosyo tungod sa 400 porsyentong gitanyag nga Return of Investment (ROI).
Tungod sa maong istratehiya naghinay-hinay na pagbiya ang ubang sakop sa usa ka organisasyon gamit ang relihiyon apan nagadawat sa giingong donasyon bugti sa 30 porsyento nga kita.
Gipasidan-an sab sa maong organisasyon nga taktakon nila ang ilang miyembro nga moapil sa laing investment scheme hinungdan nga daghan na ang mihawa kanila. (OBD)